BizPati

  • Ad
  • आज : २०७५ कार्तिक ३० गते
    Headlines :

    खल्लो विदेशी दशैं

    मणिराम धिमाल (दीपितं),अमेरिकाआश्विन ३१, २०७५

    फूले हुन् घर आँगनी मखमली गोदावरी गाउँमा
    पाके हुन् फल आँप दारिम लिची डाली लता बागमा
    फक्रे हुन वन कन्दरा कुसुम ती पैलो बिहानीसगैं
    तेत्रो रौनक छैन सुन्य छ यता खल्लो विदेशी दशै ।।१

    थापे हुन् घर गाउँका वरि परी रोटे र लिङ्गे पिङ
    खेल्दा हुन् कति हर्षले च च चुई भन्दै सहेली सङ
    बारीमा लटरम्म धान र मकै बाला झुले हुन् कतै
    तेस्तो सुन्दर दृष्य छैन नि यता खल्लो विदेशी दशैं।।२

    आए हुन् पर देशबाट नि बुबा बिर्सेर सारा दुख
    ल्याए हुन् गहना नयाँ किसिमका सम्झेर प्यारी सुत
    मख्खै छन परिवार गाउँ घरका नाता छिमेकी सबै
    कस्तो रम्झम भो उता तर यता खल्लो विदेशी दशैं।।३

    पैह्री बस्त्र नयाँ सुसज्जित सबै आफन्तका साथमा
    जाने हो अब मावली घर छिटै घोडा चडी बेगमा
    थापी आशिष औ टिका र जमरा बाजे बराजू सगैं
    खाई भोजन रम्दछन तर यता खल्लो विदेशी दशैं ।।४

    कस्तो व्यस्त समाज हो शहरको भेटिन्न मान्छे कुनै
    पीडाभित्र लुकाइ बाहिर यता देखिन्छ हाँसो कतै
    पत्नी जागिरमा पती छ घरमा छोरा र छोरी कठै
    देख्छू व्यस्त म फोन कम्प्युटरमा खल्लो विदेशी दशैं।।५

    आयो बल्ल सकेर जागिर बरा चिन्ता छ अर्को घर
    बोकी भार ठुलो रुंदै छ ऋणको थाम्नै नसक्ने कर
    को बुझ्ने परदेशको सब कथा बुझ्दैन मान्छे सबै
    मात्रै बाँकि छ सम्झना अलिकता खल्लो विदेशी दशैं।।६

    के हो भन्छ दशैं तिहार किन यो मान्नू परेको किन
    राम्रा बस्त्र नयाँ टिका र जमरा लाउनू परेको किन
    सानो सोध्दछ बार बार दिनमा संस्कार के के सबै
    मान्नै पर्छ बुबा छिमेकि किन हो मान्दैन हाम्रो दशैं।।७

    हाम्रो चाड धरापमा परि सक्यो भाषा पर्यो जालमा
    धर्मै भो टुहुरो रुँदै छ बबुरा आएर पर्देशमा
    सोच्ने हो कि समाजले समयमै फाली उपेक्षा सबै
    ढिक्का एक बनौं जुटौँ अब नहोस् खल्लो विदेशी दशैं।।८
    छन्दः शार्दुलविक्रिडित

    २६९ पटक
    प्रतिकृया दिनुहोस्
    Ad
    Ad
    Ad
    Ad