BizPati

  • आज : २०७५ चैत्र १२ गते
    Headlines :

    छमछमी नाच !

    बलराम तिमिल्सिनामाघ १४, २०७५

    बोकेर काँधमा कुहेको लास
    छमछमी नाच कमरेड छमछमी नाच !
    सोझा निमुखा त मरे मरुन
    तिमी चै वाँच कमरेड तिमी चै वाँच !
    बोकेर काँधमा……!

    यादहरूले सताउलान ,
    जम्मा गरेर सारा जलाऊ !
    आस्था निष्ठाका स्तम्भहरू ,
    राख्नु हुदैन वाँकि ढलाऊ !
    बिर्स बिगतका बाचाहरू ,
    ती काम नदिने बाचाहरू !
    बिर्स बिगतका बाटाहरू ,
    ती लक्ष नपुगिने बाटाहरू !

    युध्दमा बगेको सहिदको रगत,
    कुर्सीसँग साट कमरेड कुर्सीसँग साट !
    बोकेर काँधमा कुहेको लास,
    छमछमी नाच कमरेड छमछमी नाच !

    लाज लजावस केही हुन्न
    कोसिस गर र लाजै पचाऊ !
    इमान जमान त मर्यो मर्यो ,
    त्यो हाड-छाला मात्रै बचाऊ !
    धोका दिएर स्ववर्गलाई ,
    वैरीको पाऊमा शरण पर !
    जित्न सकेनौ शेष समर,
    जे जे सकिन्छ त्यही गर !

    मृत्यु-उत्सवको नाटक गरेर,
    थुकेर चाट कमरेड थुकेर चाट !
    बोकेर काँधमा कुहेको लास,
    छमछमी नाच कमरेड छमछमी नाच !

    २०७५|१०|१३
    सुवर्ण चोक, भक्तपुर

    १३५ पटक
    प्रतिकृया दिनुहोस्