BizPati

  • आज : २०७६ बैशाख ५ गते
    Headlines :

    होली (फागु)

    नमराज लामिछाने चैत्र ६, २०७५


    आयो फाल्गुन पूर्णिमा विविधता हाम्रो छ संस्कारको ।
    नेपाली जनको छ शुद्ध दिल यो सम्मान सत्कारको ।
    होली शब्द र फागु शब्द जनमा उत्साहका वन्दना ।
    यौटै हुन् रङको महोत्सव यहाँ आतत्मीय सद्भावना ।


    मैत्रीभावसँगै अनेक रङका होली सबै खेल्दछन् ।
    नाच्दै रङ्ग दलेर आपस यहाँ श्रद्धा सधैं राख्दछन् ।
    हाम्रो देश विशेष चाड सबमा पूजा र अवस्थासँगै ।
    माया प्रेम विचार उच्च रहने विश्वास बढ्छन् झनै ।

    होलीका र छ पूतना कुटिलका उल्लेख के गर्नु त्यो ।
    भन्छन् पूर्वज राक्षसी असुर रे चिन्ता थियो धेरको ।
    राजा दुष्ट हिरण्यकश्यप जहाँ जो दैत्य क्रोधी थिए ।
    छोरा ईश्वरभक्त पूर्ण भवमा जो दिव्य ज्ञानी थिए ।

    फुल्दा फूल वसन्त आगमनको होलीसँगै फुल्दछ ।
    चिन्ता मुक्त भएर आज हँसिलो मान्छे यहाँ घुल्दछ ।
    हर्षोल्लास बढ्यो उमङ्ग जनमा रङ्गीन भो जीवन ।
    होलीको रसरङ्ग उत्सवसँगै आनन्द हुन्छन् मन ।

    भुल्दै संस्कृति आज देशभरमा देखावटी चल्दछन् ।
    होलीको बदनाम गर्न जसरी बेढंगले खेल्दछन् ।
    इन्द्रेणी रङ भर्छ हर्ष मनमा गर्दै गरे साधना ।
    होली सत्य समाज हो विजयको सत्मार्गको कामना ।

    धन्यवाद
    कविता : होली (फागु)
    छन्द : शार्दुलविक्रीडित
    रचनाकार : नमराज लामिछाने
    ठेगना : नुवाकोट रकाठमाडौ
    हाल : रियाद साउदी अरब

    १५३ पटक
    प्रतिकृया दिनुहोस्