BizPati

  • आज : २०७६ बैशाख ६ गते
    Headlines :

    यस्तो दिनको प्रतिक्षा छ !

    बलराम तिमिल्सिनाचैत्र २५, २०७५

    भ्रम सही
    तर यस्तो दिनको प्रतिक्षा छ-
    भूतपूर्व शासकहरूका
    करङ्ग भाँचिएका खवर छापियुन
    उनीहरू
    जेल परेका खवर छापियुन
    कमसे कम समाचारले मातेर
    भोकै पेट पनि
    भर रात सुत्न सकुन मान्छेहरू मज्जाले !

    कल्पना नै सही
    यस्तो दिनको प्रतिक्षा छ-
    अदालतको कठघरामा
    रोइरहेको देखियोस हिजोको वादशाह
    र फैसला सुनियोस-
    सर्वस्व सहित जन्म कैदको
    खवरको प्रसारणसँगै
    उल्लासले ढाकियोस सडक
    विजयोन्मादमा होस मेरो देश !

    सपना नै सही
    यस्तो दिनको प्रतिक्षा छ-
    देशको हड्डी फोरेर मासी चुस्नेहरू
    वैश्य युगका सवै वादशाहहरू
    पाता कसिएका होऊन
    र कोर्रा वर्षियोस उनीहरू माथि
    उनीहरूको वासस्थान पनि झ्यालखान होस !

    इतिहासले जरुर वदला लिन्छ
    वदला नलिने हो भने
    त्यो वास्तवमा अर्को युग नै होइन
    अलपत्र परेको यात्राको मझधारमा उभिएर
    यो देशको शासकले
    देख्न प्रतिवन्ध ठोकेको
    आतङ्ककारी सपना नै सही
    म पटक पटक त्यही सपना देखिरहेछु !

    यस्तो दिनको प्रतिक्षा छ-
    मरे भनेर फालिएकाहरू
    भकाभक चिहानबाट उठ्ने छन
    र वाँचेका भनिएकाहरूको मलामी जाने छन !

    यस्तो समयको प्रतिक्षा गर्नु
    सरासर खतरनाक छ
    थाहा भएर पनि त्यो कुरा
    म त्यही दिनको प्रतिक्षामा छु !

    २०७५|१२|२५
    सुवर्ण चोक भक्तपुर

    १४२ पटक
    प्रतिकृया दिनुहोस्