BizPati

  • Ad
  • Ad
  • आज : २०७५ बैशाख ७ गते
    Headlines :

    मलाई छ प्यारो सधैं देश मेरो

    सिर्जना अर्याल अधिकारी, नीलकण्ठ नगरपालिका ३ धादिङवेशी, धादिङ, नेपालबैशाख ४, २०७५

    सिर्जना अर्याल अधिकारी

    लुकेको छ झैँ स्वर्ग यो मृत्तिकामा
    यहाँ स्वर्ग टुक्रा झरेको छ आमा
    जहाँ बल्दछन् दीप झल्मल्ल पारी
    उदाए यहीँ सूर्य घुम्टो उघारी

    फुलेको छ चाँदी यता निर्झरीमा
    र संगीत मीठो रचेको छ झर्ना
    नदी नादमा लठ्ठिने त्यो मयूर
    अहो स्वर्ग छोडी कहाँ जान्छ दूर

    जहाँ स्वर्णका फूल फुल्छन् गरामा
    छ मोती लुकेको कुना कन्दरामा
    म मेची हुँदै पुग्छु काली किनार
    र यो देश छोडी कतै हुन्न प्यार

    यही भेष भाषा यहाँको रिवाज
    छ प्यारो मलाई यहाँको समाज
    अनेकौँ छ भाषा सयौँ जात जाति
    सबै छन् मिलेरै बसेका तथापि

    उँधौली उभौली र ल्होसार होली
    तथा ईन्द्र जात्रा सँगै हर्ष खोली
    यहाँ कृष्ण जन्माष्टमी मान्छ राई
    र उल्लास साट्छन् सधैँ दाजुभाई

    रमेको छ शेर्पा मनाएर होली
    सदाचार भन्ने नयाँ रंग घोली
    यता पूर्व नाच्दै छ है देउडामा
    अहो दंग पर्छिन् रमाएर आमा

    मिया दाइ हाम्रो दशैँ मान्न आए
    र द्यौसी र भैलो सँगै ती रमाए
    सबै पर्व यस्तै मिली मान्न पाऊँ
    म यो देश छोडेर टाढा नजाऊँ

    सबै धर्म भाषा मिली जात जाति
    बसेको छु यो विश्वको माथमाथि
    बगेको छ यो रक्तमा देश मेरो
    मलाई छ प्यारो सधैं देश मेरो

    इति

    छन्द भुजङ्गप्रयात

    ९२४ पटक
    प्रतिकृया दिनुहोस्
    Ad
    Ad