हामी सबैकाे संसारन्यूज

१२ असोज, काठमाडौँ । बाटोमा फोहोर फाल्ने गर्नुभएको छ ? अब त्यसो नगर्नुहोस कारबाहीमा पर्नुहोला । काठमाडौँ उपत्यकाका सडकहरुमा अपराधिक घटना तथा फोहोर गर्ने प्रवृत्ति बढ्दै गएपछि उपत्यकामा बृहतरुपमा सिसिटीभी जडान गरिने भएको हो ।
काठमाडौं उपत्यकामा जोडिएका क्यामेरा पर्याप्त नभएको भन्दै नेपाल प्रहरी र काठमाडौं महानगरपालिकाको संयुक्त पहलमा १९ सय भन्दा बढी सिसी क्यामेरा जडान गर्न गृहकार्य सुरु भइसकेको छ।

काठमाडौं महानगरपालिकाका मेयर विद्यासुन्दर शाक्य र प्रहरीको सञ्चार निर्देशनालयका प्रमुख डिआइजी डा राजीव सुब्बाको समन्वयमा गठन भएको सिसी क्यामेरा जडान अध्ययन समितिले काम सुरु गरेको छ ।

समितिमा काठमाडौंका महानगरपालिकाको तर्फबाट ध्रुव  काफ्ले, महेश काफ्ले र राम सापकोटा छन भने नेपाल प्रहरीको तर्फबाट प्रहरी निरीक्षकद्वय अनुप सिंह र भावना श्रेष्ठ छन्। उक्त कमिटीले अहिले सिसी क्यामेरा कति संख्यामा आवश्यक छ, कुन–कुन ठाउँमा जडान गर्ने, सहरभरि सिसीटिभी कसरी जडान गर्ने, लगानी कति लाग्ने र प्राइभेट लगानी कसरी भित्र्याउने भन्ने विषयमा अध्ययन गरिरहेको छ ।

समितिले तिहारसम्म अध्ययन सकेर प्रतिवेदन बुझाउने जनाएको छ। अहिलेसम्मको अध्ययनअनुसार काठमाडौं उपत्यकामा १९ सयभन्दा बढी सिसी क्यामेरा आवश्यक रहेको प्रारम्भिक अनुमान छ। साना गल्लीमा फाइबर नपुगेकाले फाइबर पु¥याउन ठूलो खर्च हुने अनुमान गरिएको छ। १९ सयभन्दा बढी क्यामेराको जडान गर्न लगभग ९ अर्ब लाग्ने अनुमान गरिएको छ ।

त्यस्तै क्यामेरा जडान गरिसकेपछि पनि मर्मतका लागि वार्षिक ठूलो धनराशि लाग्ने देखिएको छ । अहिले प्रहरीले काठमाडौं उपत्यकामा जोडेका सिसी क्यामेरा मर्मत गर्न मात्रै वार्षिक डेढ करोड रुपैयाँभन्दा बढी खर्च भएको आयुक्त कार्यालयले जनाएको छ ।

सिसी क्यामेरा जडान गरिसकेपछि यसको ‘मनिटरिङ’ दुई ठाउँबाट हुने बताइएको छ । एउटा नेपाल प्रहरीले गर्छ भने अर्को महानगरपालिकाले गर्छ। प्रहरीले बजार, बैंकिङ क्षेत्र, होटल, रेस्टुरेन्टलगायत अपराध हुने क्षेत्रको निगरानी गर्ने बताइएको छ ।
एता, महानगरपालिकाले भने चारवटा प्रयोजनका लागि सिसी क्यामेराबाट मनिटरिङ गर्नेछ । महानगरपालिकाले सडकको अवस्था, सम्पदाको अवस्था, फुटपाथको अवस्था र फोहोर संकलन केन्द्रको अवस्था सिसी क्योमराबाट मनिटरिङ गर्ने जनाएको छ।

सिसीटिभी जडान भएपछि कसले कहाँ फोहर फालेको छ, सम्पदामा कसले, के गरेको छ सबै कोठा भित्रबाटै हेरिने छ । जसका कारण संयुक्त पहलमा काम भएपनि मनिटरिङ भने भिन्दाभिन्दै गर्न लागिएको हो ।