हामी सबैकाे संसारन्यूज

१५ असोज, काठमाडौँ । संयुक्त राष्ट्रसंघ महासभाको ७३ औं अधिवेशनमा सहभागी हुन अमेरिका भ्रमणमा रहेका प्रधानमन्त्री केपी शर्मा ओली आइतबार मध्य अमेरिकी देश कोस्टारिकाको भ्रमणमा गएका छन् ।

नेपालसँग कूटनीतिक सम्बन्धबाहेक खासै अन्य गतिविधि नरहेको कोस्टारिकामा प्रधानमन्त्री ओलीको चार दिने भ्रमणलाई कूटनीतिक क्षेत्रका जानकारहरूले अनावश्यक भनेका छन्। पूर्व राजदूत जयराज आचार्य प्रधानमन्त्री ओलीले कोस्टारिका जानुपर्ने कारण के थियो भनेर प्रश्न गर्छन्। उनी मुलुकभित्रै जल्दोबल्दो परिस्थिति सिर्जना भइरहेका बेला त्यहाँ जानुको औचित्य पुष्टि गर्नुपर्ने बताउँछन्। ‘अहिले राज्य छ कि छैन भन्ने अवस्था छ, तर उहाँ त्यसलाई बेवास्ता गर्दै विदेश भ्रमणमा हुनुहुन्छ,’ आर्चायले भने । पहिले गृह व्यवस्थालाई राम्रो बनाएर मात्र परराष्ट्र सम्बन्धलाई जोड दिनुपर्ने आचार्यको तर्क छ ।

कञ्चनपुरकी १३ वर्षीया बालिका निर्मला पन्तको बलात्कार र हत्यामा अपराधीलाई कारबाहीको दायरामा नल्याएको आरोपमा सरकार विरुद्ध सडक, सदन र पार्टी भित्रैसमेत विरोध भइरहेका बेला प्रधानमन्त्री ओलीले परिस्थितिलाई बेवास्ता गर्दै भ्रमण लम्ब्याएका हुन् । नागरिक दैनिकमा समाचार छ ।