१५ कात्तिक, काठमाडौँ । माथिल्लो तामाकोशी जलविद्युत आयोजनाले आयोजना प्रभावितका लागि निष्काशन गरेको साधारण शेयर बाँडफाँड गरेको छ ।
आवेदनको आधारमा ‘क’ वर्गले १०२ कित्ता, ‘ख’ वर्गले ४८ कित्ता र ‘ग’ वर्गले ३४ कित्ता शयेर पाएका छन् ।
‘क’ वर्गका ३० कित्तादेखि १०० कित्ता आवेदन गर्नेले १०० कित्ता नै र ११० देखि ३०० कित्तासम्म आवेदन गर्नेले १०२ कित्ता पाएका छन् । त्यसैगरी ‘ख’ वर्गका ३० देखि ४० कित्ता शयेर माग गर्नेले माग बमोजिम र ५० कित्तादेखि ३०० कित्तासम्म माग गर्नेले ४८ कित्ता श्येर पाएका छन् भने ‘ग’ वर्गका ३० देखि ४० कित्ता माग गर्नेले ३२ कित्ता र ४० देखि ३०० कित्तासम्म माग गर्नेले ३४ कित्ता शयेर पाएका छन् ।
गत साउन १६ गतेदेखि बिक्री खुला गरेको कम्पनीले चार महिनापछि शेयर बाँडफाँड गरेको हो । आयोजना प्रभावित क्षेत्रका आधारमा क, ख र ग गरी तीन वर्ग छुट्याएर सोही आधारमा शेयर आवेदनका लागि निष्काशन गरिएकामा दुई लाख ७६ हजार आवेदकले आवेदन दिएका थिए ।
आयोजनाले गत साउन १४ गतेदेखि भदौ १६ गतेसम्म दोलखावासीका लागि शेयर निश्काशन गरेको थियो । पहिलो चरणको समयावधिमा पनि शेयर आवेदनकर्ताको भीड नघटेपछि थप पाँच दिन शेयर आवेदन भर्ने व्यवस्था मिलाइएको थियो ।
आयोजनाका अति प्रभावित, प्रभावित र दोलखा जिल्लाका अन्य बासिन्दालाई क्रमशः ‘क’, ‘ख’ र ‘ग’ वर्गमा वर्गीकरण गरी आइपीओ बाँडफाँड गरिएको हो ।
वि.सं.२०७५ कात्तिक १५ बिहीवार ०९:१४ मा प्रकाशित