हामी सबैकाे संसारन्यूज

२६ कात्तिक, काठमाडौं । युवा तथा साना व्यवसायी स्वरोजगार कोषको भ्रष्टाचार र बेथिति बारे अख्तियार दुरुपयोग अनुसन्धान आयोगले अनुसन्धान थालेको छ ।
कोषको रकम वितरण, कर्मचारी भर्ना, अनुगमन, सेवा सुविधालगायतमा व्यापक भ्रष्टाचार भएको छानविन प्रतिवेदन प्रधानमन्त्री कार्यालय मातहतको राष्ट्रिय सतर्कता केन्द्रले सार्वजनिक गरेसँगै अख्तियारले पनि अनुसन्धान थालेको हो ।
अख्तियारका प्रवक्ता रामेश्वर दंगालले स्वरोजगार कोषको अनियमितता बारे अध्ययन भइरहेको बताए । ‘सर्तकताको प्रतिवेदन र सुझावसहित सम्बन्धित महाशाखाले अध्ययन गरिरहेको छ, अध्ययनपछि के गर्ने भन्नेमा पुग्छौं,’ उनले भनेको आजको राजधानी दैनिकमा समाचार छ ।
सर्तकता केन्द्रले छानबिन प्रतिवेदन प्रधानमन्त्री कार्यालय र अख्तियारलाई पनि कार्यान्वयनका लागि भन्दै बुझाएको थियो ।
बेरोजगार तथा अशिक्षितलाई रोजगारी दिने उद्देश्यले स्थापित कोषमा कोष व्यवस्थापन समितिले स्वरोजगारको नाममा सुन व्यवसायी, बस तथा ट्याक्सी व्यवसायी, होलसेल पसल, मालसामान सप्लाई गर्ने डिलर लगायतलाई रकम बाँडेको छानबिन प्रतिवेदन सतर्कताले सार्वजनिक गरेको थियो ।