हामी सबैकाे संसारन्यूज

सन्तोष न्यौपाने, बेल्जियम
आदिवासी जनजाति महासंघका केन्द्रिय अध्यक्ष जगत बहादुर बरामले आदिवासी जनजातिहरुले आफ्नो अधिकार खोज्दा जातिय बिल्ला लगाएर विभिन्न विभेद राज्यले गर्ने गरेको हुँदा वर्तमान सविधान मान्य नरहेको बताएका छन्।

आदिवासी जनजाति महासंघ बेल्जियमको दोस्रो महाधिवेशनमा प्रमुख अतिथिका रुपमा बोल्दै अध्क्षय बरामले संविधानको दफा उपदफाहरु विभेदकारी रहेको बताए। संशोधन गराउन बारम्बार आवाज उठाए पनि त्यसको सुनुवाई हुन नसकेको गुनासो गर्दै अहिलेका शासक वर्गबाट मुलुकको समृद्ध नहुने जिकिर समेत गरे।उनले राजनैतिक दलहरुले समय अनुसार आफ्नो रंग फेर्ने हुनाले जनजातिका मुद्दा बीचमै तुहिन लागेको बताए ।

संघीय समाजबादी फोरम पार्टीका उपेन्द्र यादवप्रति लक्षित गर्दै उनले खास आर्य र मधेसीको साठ गाँठ ले गर्दा फोरम प्रति संका उब्जेको भन्दै आक्रोश प्रकट गरे।
बरामले बेल्जियममा रहेका आप्रवासी नेपालीहरुले आफू आफू बीच टुटफुट र आपसी द्वन्दमा नलागेर नेपालको विकास निर्माणमा जोड दिनुपर्नेमा जोड दिए ।
अध्क्षय बरामले नेपाल सरकार आदिवासी जनजातिहरुको चाडबाडलाई कटौती गरेको भन्दै त्यसको प्राप्तिको लागि हिँड्दा जातिय ट्याग लगायत हस्तक्षेप गर्ने गरेको आरोप लगाए। देश धर्म निरपेक्ष भइसक्दा पनि अझै गाईको मासु खाँदा जेल जानुपर्ने कस्तो नियम उनले प्रश्न तेर्स्याए।

कार्यक्रममा बोल्दै अनी वक्ताहरुले युरोपको मोडेल नेपालमा लागु गर्न सकिने हुँदा युरोप स्थित विभिन्न वैचारिक संघ संस्थाहरुले त्यसको लागि दबाब सृजना गर्नुपर्नेमा जोड दिएका थिए।उनीहरूले विकशित नेपाल र समृद्ध नेपाल निर्माणको लागि सबैलाई समान अधिकारको जरूरत पर्ने हुँदा त्यसको लागि सशक्त रुपमा लाग्नुपर्ने बताए।

कार्यक्रममा बोल्दै बेल्जियम स्थित नेपाली राजदुत लोक बहादुर थापाले नेपालको विकासमा जनजाति आदिवासीहरुको संस्कृतिलाई विश्वव्यापी गर्न चुनौती रहेको हुँदा त्यसतर्फ ध्यान दिनुपर्ने आवश्यक औंल्याएका थिए।

कार्यक्रममा नेत्र मगर,विष्णु भुजेल,मेख गुरुङ,गंगाधर गौतम,बोधराज पौडेल,जीत लामा,सुबास गुरुङ,सीता सापकोटा ,गोविन्द अधिकारी लगायतले आदिवासी जनजातिको केही मुद्दाहरू जायज रहेको हुँदा त्यसको सुनुवाईको लागि नेपाल सरकार लाग्नुपर्नेमा जोड दिएका थिए। आदिवासी जनजाति महासंघका अध्यक्ष पिजी शेर्पाको अध्यक्षतामा सम्पन्न कार्यक्रमको सञ्चालन बाबु राजा लामा ले गरेका थिए।

उक्त अधिवेशनले बाबुराजा लामाको अध्यक्षतामा नयाँ कार्यसमिति चयन गरेको छ। त्यसैगरी वरिष्ठ उपाध्यक्षमा मुना राई, उपाध्यक्ष होम गुरुङ, उपाध्यक्ष सुर्य नारायण श्रेष्ठ, यामुना रोक्कामगर लगायत रहेका छन् ।