हामी सबैकाे संसारन्यूज

 ७ कात्तिक,याउन्डे, (क्यामरुन) । क्यामरुनीयन राष्ट्रपति पाउल बियाले आगामी अक्टोवर २४ का दिन राष्ट्रिय शोकको घोषणा गर्नु भएको छ ।

अफ्रिकी मुलुक क्यामरुनमा गत शुक्रबार भएको एक रेल दुर्घटनामा ७० जनाको मृत्यु भएपछि राष्ट्रपति बियाले उक्त शोकको घोषणा गर्नु भएको छ ।

राष्ट्रपति बियाले शुक्रबार भएको दुर्घटनामा मृत्यु भएका प्रति श्रद्धाञ्जली ब्यक्त गर्दै अक्टोवर २४ का दिन राष्ट्रिय शोकको शनिबार घोषणा गर्नु भएको छ ।

यस्तै राष्ट्रपति बियाले देशैभरी तथा विदेशस्थित कुटनीतिक नियोगमा पनि आधा झण्डा झुकाउने घोषणा गर्नु भएको छ ।

विदेश भ्रमणमा रहनु भएका राष्ट्रपति बियाले घाइतेहरुको उपचारमा सहयोग गर्न सरकारलाई निर्देशन दिनु भएको छ भने, दुर्घटनाको कारण पत्ता लगाउन अनुसन्धान थाल्न आदेश दिनु भएको छ ।

क्यामरुनको राजानी याउन्डेबाट आर्थिक राजधानी डाउआलातर्फ गईरहेको अवस्थामा शुक्रबार भएको रेल दुर्घटनामा कयौ यात्रु घाइते पनि भएका छन् ।

उनीहरुको विभिन्न अस्पतालमा निःशुल्क उपचार भइरहेको छ । रेलमा क्षमता भन्दा दोब्बर यात्रु सवार रहेका कारण दुर्घटना भएको अधिकारीहरुले जनाएका छन् । घटनास्थल याउन्डेबाट १२० किलोमिटर टाढा रहेको समाचारमा जनाइएको छ । रासस ÷सिन्ह्वा