हामी सबैकाे संसारन्यूज

११ मङ्सिर,स्वीट्जरल्याण्ड ।  स्वीट्जरल्याण्डको पूर्वी शहर सोलोथर्नमा आइतबार राति भएकोे आगलागीमा परी कम्तीमा बालबालिकासहित छ जनाको मृत्यु भएको प्रहरीले सोमबार जनाएको छ ।

आगलागी हुँदा भवनभित्र करीब २० जना रहेको बताइएको छ । “भवनमा रहेका अधिकांश व्यक्तिलाई अग्नी नियन्त्रकले सकुशल उद्धार गरेको भए पनि बालबालिकासहित छ जनालाई उद्धार गर्न सकिएन,” सोलुथर्न प्रहरीले एक विज्ञप्तिमार्फत जानकारी गराएको छ । “उनीहरूको घटनास्थलमा नै मृत्यु भएको थियो ।”

घटनाबारे समाचार लिन पुगेका एएफपी फोटो पत्रकारले शहरको मध्यभागमा रहेको भवन आगलागीपछि पूर्णरूपमा कालो भएको बताए । आगलागीबाट त्यहाँका बासिन्दा शोकमग्न बनेको बताउँदै तत्काल क्षतिको विवरण आउन नसकेको उनले बताए ।

प्रहरीले आगलागीका कारण नखुलेकाले अनुसन्धान शुरु गरिएको जनाएको छ । राति २ः१० बजे भवनबाट अकस्मात् धुँवा निस्केपछि स्थानीयले सुरक्षाका लागि घण्टी बजाएका थिए । सूचना पाउनासाथ एम्बुलेन्स, अग्नी नियन्त्रकलगायत दर्जनौँ उद्धारकर्मी घटनास्थल पुगेर थप क्षति हुनबाट बचाएको प्रहरीले जनाए ।