हामी सबैकाे संसारन्यूज

२९ मंसिर, बनेपा । मर्दन सिंह लामा पूर्व लडाकु हुन् । उनी भूमिगतका बेला प्रेम नामले परिचित थिए । माओवादी युद्धकालमा उनी आफ्ना कमरेडहरुसहित कामीडाँडामा फौजी तालिम गर्थे । युद्ध सकिएपछि उनले बन्दुक विसारएर कोदाली चलाएका छन् । अहिले उनी चिया खेती गर्छन् ।
काभ्रेको बेथानचोक गाँउपालिका ५ मा पर्छ कामी डाँडा । द्धन्द्धकालमा यो ठाउँ माओवादीको आधार इलाका थियो । धेरैपटक नेपाली राजनीतिलाई प्रभाव पार्ने खालका घटना यहाँबाट निर्देशित भए । जनमुक्ति सेनाले यसलाई भूमिगत तालिम केन्द्रका रुपमा प्रयोग गर्थे । जताततै बंकर खनिएका थिए । शान्तिप्रक्रिया सुरुभएपछि माओवादीको पहिलो केन्द्रीय बैठक यहाँ बसेको थियो ।
त्यसपछि राष्ट्रिय रुपमै यो ठाउँको चर्चा हुन थाल्यो । सेना समायोजनअघि तेस्रो डिभिजनको शिविर यहि राख्ने प्रस्तावपछि थप चर्चित भयो । तर, शान्ति प्रक्रियापछि मर्दनसिंहको झैं कामी डाँडाको पनि परिचय फेरिएको छ । युद्ध सकिएको १२ वर्ष नाघ्दा युद्धभूमि कृषिभूमिमा परिणत भएको छ । आजको अन्नपूर्णपोस्ट दैनिकबाट