हामी सबैकाे संसारन्यूज

३ पुस, काठमाडौं । तीन दशकको प्रतिक्षापछि खानेपानी आउनै लाग्दा मेलाम्ची आयोजना अर्को झमेलामा परेको छ । निर्माणको जिम्मा लिएको इटालियन ठेकेदार कम्पनी सीएमसी दी रेभेन्नाले ठेक्का सम्झौता रद्द गर्न सूचना (नोटिस टु टर्मिनल) बुझाएको छ ।
आयोजनालाई दुई साताअघि नै सूचना दिएको ठेकेदार कम्पनीका प्रतिनिधि स्वदेश फर्कन थालेपछि सरकारले पासपोर्ट नियन्त्रणमा लिएको छ । ठेकेदार कम्पनीका कर्मचारीको जस्तै मेलम्चीको पनि भविष्य अन्योलमा परेको आजको नयाँपत्रिका दैनिकमा समाचार छ ।
आयोजनाको एकतर्फि ठेक्का रद्द गर्न नमिल्ने भन्दै सरकारले छिटो सक्न निर्देशन दिएको थियो । तर, दुई दिनअघि आयोजनास्थलबाट ठेकेदार कम्पनीका सबै प्रतिनिधि काठमाडौं आएका थिए, उनीहरु सोमबार स्वदेश फर्कने तयारीमा थिए । तर, म्यानेजर क्रिस्टियानो प्रेसोसहित आठजनाको पासपोर्ट नियन्त्रणमा लिएर प्रहरीले मेलाम्ची आयोजनालाई दिएको छ ।