हामी सबैकाे संसारन्यूज

१२ पुस, काठमाडौँ । महानगरीय प्रहरी कार्यालयका प्रमुख एवं प्रहरी नायब महानिरीक्षक शैलेश थापा क्षेत्रीले समाजमा कुनै अपराध भए तत्काल प्रहरीलाई खबर गर्न आग्रह गरेका छन् ।

‘समुदाय–प्रहरी साझेदारी’ कार्यक्रमअन्तर्गत बुधबार काठमाडौँ महानगरपालिका–१० बानेश्वरमा आयोजित कार्यक्रममा उनले समाजमा हुने अपराध नियन्त्रणका लागि समुदाय र प्रहरी सँगसँगै अगाडि बढ्नुपर्नेमा जोड दिए ।
महानगरीय प्रहरीवृत्त बानेश्वरका प्रमुख एवं प्रहरी नायब उपरीक्षक गोविन्द्र काफ्लेले समाजमा हुने अपराध नियन्त्रणका लागि प्रहरीलाई नागरिकस्तरको सहयोग आवश्यक रहेको बताए । प्रहरी विद्यालय सम्पर्क समितिका अध्यक्ष एवं रत्नराज्य माध्यामिक विद्यालयका प्राचार्य डा गीता खरेलले समाजमा हुने अपराध रोकथामका लागि विद्यार्थीको ठूलो भूमिका रहेको बताए ।

सनराइज विद्यालयका प्राचार्य तेजप्रकाश श्रेष्ठले समुदाय–प्रहरी साझेदारी कार्यक्रमले समाजमा हुने अपराध नियन्त्रणमा सहयोग पुग्ने विश्वास व्यक्त गरे । सोही अवसरमा काठमाडौँ महानगरपालिका– १०, ३१ र ३२ का ३१ विद्यालयका शिक्षक तथा विद्यार्थीको सहभागिता रहेको थियो ।