संघीय संसद भवन नयाँ बानेश्वरमा मंगलबार बसेको प्रतिनिधिसभाको बैठकमा रोष्टममा गएर विरोध गर्दै नेपाली काँग्रेसका सांसदहरु । तस्वीर : रत्न श्रेष्ठ, रासस ।
८ माघ, काठमाडौँ । प्रतिनिधिसभाको बैठक शुरु हुनासाथ काङ्ग्रेस सांसद उठेपछि आजको बैठक अवरुद्ध हुन पुगेको छ । सभामुख महराले बैठक सञ्चालन गर्दै कार्यसूची अगाडि बढाउने क्रममा शिक्षा विज्ञान तथा प्रविधिमन्त्री गिरिराजमणि पोखरेललाई शिक्षा तथा स्वास्थ्य समितिको सहितको राष्ट्रिय चिकित्सा शिक्षा विधेयक छलफलका लागि पेश गर्न भनेपछि कांग्रेस सभासदहरु आ–आफ्नो सिटबाट उठेर संसद अवरुद्ध गरेका थिए ।
सभामुख कृष्णबहादुर महराले आफूले सरकारको ध्यानाकर्षण गराइसकेको भन्दै बैठक सञ्चालनमा सघाउन पटक पटक आग्रह गर्दा पनि काङ्ग्रेसका सांसदहरु उठेर बैठक चल्न नदिएपछि सभामुख महराले पहिलो बैठक १५ मिनेटका लागि स्थगित गरेका थिए । बैठक पुनः सञ्चालन गर्न खोज्दा पनि अवरुद्ध भैरहे पछि सभामुख महराले शुक्रबारसम्मका लागि बैठक स्थगित भएको जानकारी गराएका थिए ।
नेपाली काङ्ग्रेसले आफ्ना नेताहरु गिरिजाप्रसाद कोइराला र सुशील कोइरालाको नाममा स्थापना भएको अस्पतालको विषयमा सरकारले कुनै निर्णय नगरेको भन्दै संसद् बैठक दुई पटकसम्म अवरुद्ध गरेपछि सूचना टाँस गरी आजको बैठक स्थगित भएको छ । प्रतिनिधि सभा बैठक २०७५ माघ ११ गते शुक्रबार दिनको १ः०० बजे बस्नेछ ।
भिडियो स्रोत : प्रतिनिधि सभा नेपाल
