हामी सबैकाे संसारन्यूज

अहिलेसम्म
एउटै पनि यस्तो समाचार छापिएन
प्रहरीको इन्काउण्टरमा परेर
भ्रष्टचारी मरेको समाचार छापिएन !

अहँ कहिलै छापिएन !
घुष लिदा लिदैको हाकिम
प्रहरी इन्काउन्टरमा परेको
यस्तो समाचार कहिलै छापिएन
वरु दैनिक पढ्नु पर्यो –
घुष लिदा लिदै प्रहरी हाकिम
अख्तियारको फन्दामा परेका समाचार
प्रहरीकै साथमा रहेको
सुन अनायास तामो भएका समाचार
त्यसपछि नानीहरूले सोधे-
प्रहरी र घुषखोर दाजुभाइ हुन अंकल ?

वर्ष भरिमा
कम्तिमा यस्तो समाचार पनि आओस-
ठग ठेकेदार मुठभेडमा ठहरै
कमिशनखोर नेता भाग्दा भाग्दै ढल्यो
भ्रष्ट हाकिमलाई चार गोली
घुषियाहरूलाई पक्रेर
भुसिया कुकुरलाई खान दिइयो
भो कुरा छोड्नुस
यस्तो समाचार कहिलै छापिएन !
प्रश्न फेरि पनि उठ्छ-
के ठेकेदार र प्रहरी ज्वाइँ ससुरा हुन ?

हप्ता असुलीमा इलाका जुधेपछि
या डनहरूले नेता हुन खोजेपछि
डनहरू नेता बन्दा
साविकको नेतालाई घच्च लागेपछि
रातारात इन्काउन्टर हुन्छ !
यसरी मर्नेहरूको सूची लम्विएपछि
अर्को प्रश्नको पुच्छर पलाउँछ-
के डन र प्रहरी एक अर्काका जार हुन ?

प्राय इनकाउण्टरमा पनि
ढल्ने गर्छन-
चिम्सो आँखा हुने डनहरू
श्याम वर्णका मात्र मानिसहरू !
या भूइँ तहका आवाराहरू
तर,
एउटा पनि सुन तस्कर
एउटा पनि खोला तस्कर
एउटा पनि चेलीबेटी तस्कर
कहिलै इन्काउन्टरमा परेनन
त्यसपछि फेरि प्रश्न जन्मन्छ-
के प्रहरी र तस्कर प्रेमी-प्रेमिका हुन ?

आजसम्मको इन्काउन्टरको सूचीमा
कहिलै नपरेपछि
क श्रेणीका ठग ठेकेदार
यही श्रेणीका कमिशनखोरहरू
तस्करहरू , लुटेराहरू
वलात्कारीहरू र भ्रष्ट नेताहरू
सोझाको मनमा पनि उठ्छ प्रश्न –
“प्रहरी हाम्रो साथी !”
यो जाली नारा
के ठग, भ्रष्ट र तस्करहरूले रचेका हुन ?

२०७५|१०|१०
सुवर्ण चोक, भक्तपुर