हामी सबैकाे संसारन्यूज

आनन्द प्रसाद शर्मा, हाल रियाद, साउदी अरब

(१)
धर्म भन्ने त हुन् आमा, संस्कृति पहिचान हुन् ।
धर्म भन्ने त हुन् आस्था, विश्वास सहिछाप हुन् ।।
धर्म भन्ने त हुन् सत्य–निष्ठा, संकल्प साश्वत ।
धर्ममा घुम्छ संसार, बाँचेको छ चराचर ।।

(२)
धर्म भन्ने त हुन् आमा, नबेच्नु धर्म मित्र हो ।
धर्म भन्ने त हुन् आस्था, आस्था नबेच्नु मित्र हो ।।
धर्म विश्वास हो सत्य, नबेच्नु धर्म सत्य यो ।
बेची यी सम्पति सारा, खोज्नु के पहिचान त्यो ।।

(३)
धर्म भन्ने त हुन् आस्था, गर्नु सम्मान धर्मको ।
सबैको धर्मको गर्नु, सद्भाव ‘श्रेष्ठ धर्म’ हो ।।
धर्म–सत्भावले सत्रु, हितैषी मित्र बन्दछ ।
धर्म–दुर्भावले गर्दा मित्र, त्यो सत्रु बन्दछ ।।

(४)
सम्पत्ति हातको मैलो, कर्ममा हुन्छ निर्भर ।
पसिना श्रम पोखेमा, जिन्दगी यो छ उर्बर ।।
अन्न–पानी भए हुन्छ, खाँदैन जिन्दगी सुन ।
सम्पति प्राप्तिकै लागि, धर्म नै बेच्नु खै किन ??
(५)
ज्ञान विज्ञान बेचेर, गर्नु सम्मान आर्जन ।
सीप उत्पादन बेची, गर्नु राम्रो धनार्जन ।।
पसिना श्रम बेचेर, पाल्नु शरीर श्रेय हो ।
सम्पत्ति प्राप्तिकै लागि, न्याय नबेच मित्र हो ।।

(कवि नेपाली राजदुतावास रियाद, साउदी अरबका कुटनैतिक नियोग प्रमुख हुनुहुन्छ ।)