हामी सबैकाे संसारन्यूज

१ चैत, काठमाडौँ । वैदेशिक रोजगार प्रवद्र्धन बोर्डले आजदेखि औपचारिक रुपमा बबरमहलबाट आफ्नो सेवा शुरु गरेको छ । यसअघि बार्डले बानेश्वरबाट सेवा प्रदान गर्दै आएको थियो । सेवाग्राहीको सहजताका लागि बबरमहलस्थित नेपाल औषधि लिमिटेडको भवनमा कार्यालय स्थानान्तरण गरिएको बोर्डका निर्देशक श्रेष्ठले जानकारी दिए ।

नयाँ स्थानबाट बोर्डले सेवा दिन थालेसँगै श्रम, रोजगार तथा सामाजिक सुरक्षामन्त्री गोकर्ण विष्टले आजै कार्यालयको निरीक्षण गरे । सो क्रममा उनले स्थान परिवर्तन भएरमात्र सेवाग्राहीलाई सुविधा नहुने भन्दै मानसिकता परिवर्तन गरेर सेवा प्रदान गर्न कर्मचारीलाई निर्देशन दिए ।

विदेशी भूमिमा हुने श्रमिकको अस्वभाविक मृत्युलाई न्यूनीकरण गर्न सरकार गम्भीर रहेको उल्लेख गर्दै उनले वैदेशिक रोजगारीमा जाने श्रमिकलाई अभिमुखीकरण गरेर पठाउनेतर्फ ध्यानाकृष्ट भएको बताए । उनले भने, “स्वास्थ्यको सामान्य ख्याल नराख्दा, सामान्यभन्दा सामान्य जानकारी नहुँदा नेपाली युवाले विदेशी भूमिमा ज्यान गुमाउनुपरेको छ, अस्वभाविक मृत्यु न्यूनीकरण गर्न श्रमिकलाई सम्बन्धित देशको भाषा, हावापानीलगायत विषयमा अभिमुखीकरण गरेर पठाउनुपर्छ ।”

विभिन्न कारणबाट मृत्यु तथा अङ्गभङ्ग भएका व्यक्तिले पाउनुपर्ने क्षतिपूर्तिका लागि राजधानी धाउनुपर्ने अवस्थाको अन्त्य गर्न सम्बन्धित स्थानीय तहबाटै क्षतिपूर्ति तथा आर्थिक सहायता वितरण गर्नेगरी काम थालनी गरिएको उनको भनाइ छ ।