मृतक गोपाल कारन्जित
१६ चैत, काठमाडौं । संसारमा मानवियता विस्तारै हराएर जाँदैछ । जीवन जिउने क्रममा मानिसमा सबैभन्दा ठूलो मानवियता नै हुनुपर्छ । तर, मानिसले मानवियता नै बिर्सियो भने कसैको ज्यान पनि जान सक्छ भन्ने देखाएका छन् राजधानीका एक ट्याक्सी ड्राइभरले ।
उनले ट्याक्सी चलाउने हजारौं चालकमाथि अविस्वास जगाउने काम मात्रै गरेनन्, आफ्नै ट्याक्सीमा चढाएर ल्याएको बिरामीलाई सडकको छेउँमा फ्याकेर ज्यान लिएका छन् ।
सडकको छेउँमा कतै त्यस्ता अशक्त, वृद्धवृद्धा वा विरामीलाई देख्दा मानवियताको आधारमा उनीहरुलाई सम्बन्धीत ठाउँमा छोडिदिनु पनि उनीहरुको दायित्व, कर्तव्य मात्र नभई मानवियता हुन्छ । तर, ट्याक्सी ड्राइभर कमल श्रेष्ठले त बाटोमा हिडेको होइन, आफ्नै ट्याक्सीमा चढेर आउँदा बेहोस भएका बिरामीलाई अस्पताल नलगेर ट्याक्सीबाट घिसारेर फालिदिएको दृश्यले सबैलाई पीडा दिन्छ ।
के भएको थियो त ?
गोकर्णेश्वर निवासी गोपाल कारन्जित सुगर र प्रेसरका विरामी थिए । ६० वर्षीय कारन्जित बुधबार बिहान जाँच गराउन चाबहिलको मेडिकेयर अस्पताल गए भने छोरा प्रविण मोटर साइकलमा । बुबाको जाँच गराएपछि छोरा मोटरसाइकलमा फर्किएका थिए भने कमजोर महसुस गरेका कारन्जित ट्याक्सीमै फर्किए । उनले चालकलाई गोपिकृष्ण हलको बाटो हुँदै गोकर्णेश्वर स्थित घरमा पु¥याउन भनेका थिए ।
उनी ट्याक्सी चढेको केही समयमै बेहोस भए । तर चालकले उनलाई छेउमै रहेको अस्पताल लैजाने प्रयास समेत गरेनन् । बरु घिसारेर हेल्पिङ ह्याण्डस् अस्पताल अगाडिको सडक किनारमा झारिदिए र आफू भागे । स्थानीयले निकैबेर पछि प्रहरीलाई खबर गरेर उनलाई हस्पताल पठाए । त्यो बेला सम्म उनको मृत्यु भइसकेको थियो ।
बुबाको प्रतिक्षामा रहेका छोरा प्रवीणलाई अस्पतालबाट फोन आयो । उनी पुग्दा बुबाको मृत्यु भइसकेको थियो ।
बुबालाई सडकमा बेहोस अवस्थामा भेट्टाएर अस्पताल लगिएको उनले थाहा पाए । कसरी सडकमा ढले भनेर सिसिटिभी फुटेज हेर्दा प्रवीण मात्र होइन, प्रहरी अधिकारी समेत चकित भए । बा १ ख ३८५१ नम्बरको ट्याक्सी चालक कमल बहादुर श्रेष्ठले देखाएको संवेदनहीनताले जो कोहीलाई स्तब्ध बनाउँछ । सय मिटर परको अस्पताल हुँदाहुँदै पनि सिकिस्त बिरामीलाई उनले ट्याक्सीबाट घिसारेर फालिदिएको दृश्य शुक्रबार सामाजिक सञ्जालमा भाइरल बनेको थियो ।
सिसिटिभीकै आधारमा प्रहरीले श्रेष्ठलाई पक्राउ गरेर कारबाही अघि बढाएको छ । शनिबारको नयाँपत्रिका दैनिकबाट
वि.सं.२०७५ चैत १६ शनिवार ०७:२७ मा प्रकाशित