हामी सबैकाे संसारन्यूज

नेपाली कांग्रेसका पुर्व सभापति तथा पूर्वप्रधानमन्त्री गिरिजाप्रसाद कोइरालाको नाममा स्थापित जीपी कोइराला फाउण्डेशन अमेरिका शाखाले न्युयोर्कमा कार्यालय स्थापना गरेको छ ।

कोइरालाको नवौं स्मृति दिवसको अवसरमा आयोजित श्रद्धाञ्जलीसभा कार्यक्रमकै अवसरमा न्युयोर्कको ज्याक्सन हाईटसमा फाउण्डेशनले आफ्नो कार्यालयको उद्घाटन गरेको हो । कार्यक्रममा प्रमुख अतिथि रहेका जनसम्पर्क समिति भारतका संस्थापक सदस्य एवम् फाउण्डेशनका सल्लाहकार मोहनसिंह बिष्टमार्फत कार्यालयको उद्घाटन गरिएको थियो । उद्घाटन कार्यक्रममा बोल्दै प्रमुख अतिथि विष्टले नेपाली राजनीतिमा जिपी कोइरालाको योगदानको चर्चा गर्दै फाउण्डेशनले लोकतन्त्र र शान्तिको पक्षमा ऐक्यबद्ध भइ कार्य गर्ने विश्वास व्यक्त गरे ।

कार्यक्रममा बोल्दै जनसम्पर्क समिति अमेरिकाका महासचिव मुनिन्द्रबिक्रम नेम्वाङले लोकतन्त्र, शान्ति र विकासका क्षेत्रमा स्वर्गीय गिरीजा बाबुले पु¥याएको योगदान अत्यन्त महत्वपूर्ण रहेको बताए ।

कार्यक्रम सञ्चालन गर्दै फाउण्डेशनका महासचिव सुरेन सापकोटाले संस्थाको स्थापना र उद्देश्य बारेमा जानकारी गराएका थिए भने अध्यक्ष सोमनाथ घिमिरेले कार्यक्रमको अध्यक्षता गर्दै संस्थाको उद्देश्य, भावी योजना र कार्यक्रमका बारेमा अवगत गराएका थिए । उनले बिभिन्न कारणले समस्या भोगिरहेका नेपाली समुदायका सदस्यहरुलाई संस्थाले आवश्यकतानुसार सहयोग गर्दै जाने बताए ।

कार्यक्रममा जनसम्पर्क समिति न्यूर्याेकका महासचिव महेश मल्ल, एनआरएन अभियन्ता सुमन हुमागाई, आदिवासी महिला संघ अमेरीकाकी अध्यक्ष संगिनी रानामगर, यूएस नेपाल स्पोर्टस कल्चरका अध्यक्ष मोहन वाइबा, फाउण्डेशनकी कोषाध्यक्ष बृन्दा राई, सहकोषाध्यक्ष पुनम राना मगर, केन्द्रिय सदस्यद्वय श्याम कार्की र शरदा झेत्री लगायतले शुभकामना मन्तब्य राखेका थिए ।

स्वर्गीय गिरिजाप्रसाद कोइरालाको सम्झनामा स्थापित फाउण्डेशनले नेपाल र बिदेशमा समेत आफ्नो शाखा विस्तार गर्दै देशका निम्ति लोकतन्त्र, शान्ति र विकासका क्षेत्रमा योगदान गर्दै जाने उदेश्य राखेको जनाइएको छ ।