हामी सबैकाे संसारन्यूज

२९ चैत, पोखरा । नयाँ वर्षको अवसरमा पश्चिमाञ्चल होेटल सङ्घले वर्षेनी आयोजना गर्दै आएको यस वर्षको ‘फेवा नव वर्ष महोत्सव २०७६’ को सम्पूर्ण तयारी पूरा भएको छ । आजदेखि पोखराको फेवा किनारस्थित कोमागाने पार्कमा हुने त्रिदिवसीय १६औँ संस्करणमा खाना, संस्कृति र सङ्गीतलाई विशेष जोड दिइएको सङ्घका अध्यक्ष विकल तुलाचनले जानकारी दिए । उनका अनुसार महोत्सवमा कूल २२ नेपाली खानाको व्यवस्था रहनेछ ।

महोत्सवमा पर्यटक र अन्य आगन्तुक गरी कूल एक लाखले सहभागिता जनाउने बताउँदै उनले उक्त अवसरमा सांस्कृतिक झाँकी प्रतियोगिता र गण्डकी प्रदेशस्तरीय नृत्य प्रतियोगिता आयोजना गरिने जानकारी दिनुभयो । सङ्घका निवर्तमान अध्यक्ष भरतराज पराजुलीका अनुसार महोत्सवका अवसरमा सङ्घअन्तर्गतका सदस्य होटलको मेन्युमा १५ प्रतिशत छुट प्रदान गरिएको छ ।

नेपाल भ्रमण वर्ष २०२० कार्यक्रम कार्यान्वयन समितिका सदस्य एवं नेपाल पर्यटन बोर्डका सदस्य विप्लव पौडेलले फेवा महोत्सव आयोजनास्थलमा चैत ३० गते भ्रमण वर्षको शुभारम्भ गरिने जानकारी दिए । स्थानीय विभिन्न सङ्घसंस्थासँग मिलेर कार्यक्रमलाई भव्य बनाउन समन्वय भइहेको जानकारी दिँदै उनले भ्रमण वर्षको शुभारम्भले पोखरालाई पर्यटकीय राजधानी बनाउने अभियानमा सहयोग पुग्ने विश्वास व्यक्त गरे ।

नेपाल पर्यटन बोर्डका गण्डकी प्रदेश कार्यालय प्रमुख मणि लामिछानेले भ्रमण वर्ष कार्यक्रम घोषणाको अन्तिम तयारी सकिएको बताए । उनले गण्डकी प्रदेश सरकारले मनाइरहेको आन्तरिक पर्यटन वर्ष २०१९ लाई सफल बनाउनसमेत प्रदेश सरकारसँग बोर्डले समन्वय गरिरहेको जानकारी गराए ।

एक करोडको सहयोग

गण्डकी प्रदेश सरकारले बारा र पर्साका हावाहुरीबाट पीडित परिवारलाई रु एक करोडको आर्थिक सहयोग गर्ने भएको छ । गण्डकी प्रदेश सरकारको विहीबार बसेको मन्त्रिपरिषदको बैठकले पीडित परिवारका लागि विपत व्यवस्थापन कोषबाट सो रकम सहयोग गर्ने निर्णय गरिएको भौतिक पूर्वाधार तथा विकासमन्त्री एवं सरकारका प्रवक्ता रामशरण बस्नेतले जानकारी गराए ।

उक्त सहयोग रकम प्रदेश नं २ को सरकारको खातामा जम्मा गरिने र सो रकमबाट पीडित परिवारको आवास निर्माणमा खर्च हुने उनले बताए । प्रदेश नं २ को बारा–पर्सा जिल्लामा चैत १७ गतेको हावाहुरीबाट ठूलो परिमाणमा जनधनको क्षति भएको थियो ।