हामी सबैकाे संसारन्यूज

केलादीमा तीनवटा शव दहन गृह (लास जलाउने घाट) निर्माण गरेपछि कालीगण्डकी नदीमा पानीको वेग बढ्दा र वर्षा हुँदासमेत लास जलाउन सहज हुँदै आएको हो । पानी परेका बेला लास जलाउन समस्या हुँदै आएको र मलामीलाई पानीले भिज्ने समस्याले नदीमा लास फाल्दै आउन थालेपछि यस क्षेत्र प्रदूषित बनेको थियो ।

कालीगण्डकी नदीको तिरमा दुईवटामा लास दहन गर्ने र एउटा कर्कटपाताले छाएको शव दहन गर्ने गृह नदीदेखि माथि भएकाले पानीको सतह बढ्दासमेत लास दहन गर्न सहज हुँदै आएको स्थानीय बासिन्दा बताउँछन् । केलादीघाटस्थित कालीगण्डकी नदीको तिरमा शव दहनगृह चार वर्षअघि रु १५ लाखको लागतमा निर्माण भएको थियो । निश्चित स्थानमा शव दहन गर्दा केलादीघाट आसपासको क्षेत्रमा फोहोर हुन पाएको छैन ।

नदीको किनारामा जथाभावी लास जलाउँदा काली नदीको आसपासको क्षेत्र फोहोर बन्दै आएको थियो । निश्चित स्थानमा मात्र लास जलाउन थालेपछि नदीको किनारा अहिले प्रदूषित हुन नपाउँदा सफा र सुन्दर बन्दै गएको वडा नागरिक मञ्चका सहसंयोजक सूर्यप्रसाद पोखरेल बताउनुहुन्छ ।

उहाँका अनुसार पहिले पहिले वर्षा हुँदा र कालीगण्डकीमा पानीको वेग बढ्दा लास दहन गर्न समस्या हुँदै आएको थियो । जथाभावी लास जलाउँदा दाउरा, कपडा, कोइला, हड्डीले नदी किनाराको सुन्दरता सङ्कटमा परेको थियो । घाटमा नै लास जलाउनुपर्ने र जथाभावी फोहोर गर्न स्थानीयवासीले रोक लगाउँदा कालीगण्डकी नदीको किनारा केलादीघाट फेरि पहिले जस्तै सफा र सुन्दर बन्न थालेको मञ्चका सहसंयोजक पोखरेल बताउनुहुन्छ ।

लास दहन गर्ने पाल्पा जिल्लाको रामपुर नगरपालिका, मित्याल, सहलकोट, भिरुवास लगायतका स्थानबाट ल्याउने गर्दछन् । स्थानीय बासिन्दा केशव न्यौपानेले नदी मान्छे मर्दा दहन गर्ने स्थल मात्र नभई पुण्य प्राप्तिका लागि स्नान गर्ने प्रमुख थलो भएकाले सबैले केलादीघाटको आसपासको महत्व बुझेर यस क्षेत्रलाई जोगाउनुपर्ने बताउनुभयो ।

नदीजन्य वस्तुको निकासीबाट कालीनदीको सौन्दर्यता गुम्दै गएको छ । नदी आसपासका क्षेत्रलाई सफा राख्न सकेको अवस्थामा कालीगण्डकी नदीको गरिमा अझै उँचो रहने स्थानीयवासीको भनाइ छ । रासस