२६ बैशाख, काठमाण्डौं । सवारी दुर्घटनामा परेर ७ जनाको मृत्यु भएको छ ।
देशका विभिन्न ठाउँमा बुधबार भएको दुर्घटनमा परेर ७ को मृत्यु भएको र ४२ जना घाईते भएको प्रहरीले जनाएको छ ।
प्रहरीका अनुसार बुधबार १५ः२० बजेदेखि साँझ २०ः५० बजेसम्मको सो अवधिमा सिन्धुपाल्चोक, मोरङ, बाग्लुङ, म्याग्दी, धनुषा, रामेछाप, सर्लाही र नवलपरासी (पुर्व) मा ती दुर्घटना हुँदा ७ जनाको ज्यान गएको ।
दुर्घटनामध्ये सिन्धुपाल्चोक बलेफीस्थित बलेफी बजारमा बा.३ ख ९३४ नम्बरको बसले बा.७२ प ९०३४ नम्बरको स्कुटरलाई ठक्कर दिँदा स्कुटर चालक बलेफी बजारमा सुन पसल गरी बस्ने बाह्रबिसे घुम्थाङका २५ वर्षीय विजय प्रधानको घटनास्थालमै मृत्यु भएको हो ।
बस खाडीचौरबाट बलेफीतर्फ जाँदै गरेको थियो । दुर्घटनाको बिषयलाई लिएर मृतकका आफन्तले बाटो अवरोध गर्नुका साथै प्रहरीको गाडीमा ढुङ्गामुढा गर्दा ११ जना प्रहरी कर्मचारी सामान्य घाइते भएका छन् ।
ढुङ्गामुढा प्रहार गर्ने ४ जना र बस चालकलाई समेत प्रहरीले नियन्त्रणमा लिएको छ । साथै मोरङ बुढिगंगा बासबारीमा को.१ क १५६५ नम्बरको ट्रकले को.१ ज २२७७ नम्बरको भ्यानलाई ठक्कर दिँदा भ्यानमा सवार सुनसरी इटहरी बस्ने ५७ वर्षीय देव प्रसाद अधिकारीको मृत्यु भएको छ ।
भ्यानका चालक सुनसरी चतराका २६ वर्षीय जिवना खड्का समेत गरी ११ जना घाइते भएका छ । घाइतेहरुको बिएमसि अस्पताल गंगा चोकमा उपचार भइरहेको छ । ट्रकका चालकलाई प्रहरीले नियन्त्रणमा लिएको छ ।
यसैगरी बाग्लुङ निसीखोला धुँवाकोटमा गुडिरहेको लु.१ च ६७५२ नम्बरको पिकअप भ्यानबाट खसेर सोही ठाउँ बस्ने खीम बहादुर सुनारका १२ वर्षीय छोरा लक्षु सुनारको मृत्यु भएको छ ।
भ्यान झिवाखोलाबाट बुर्तिबाङतर्फ जाँदै गरेको थियो । दुर्घटनामा घाइते भएका भ्यानमा सवार खेमलाल सुनारको १२ वर्षीय छोरा बिष्णु सुनारको प्राथमिक स्वास्थ्य केन्द्र बुर्तिबाङमा उपचार भइरहेको छ । चालकलाई प्रहरीले नियन्त्रणमा लिएको छ । साथै म्याग्दी बेनी नेप्टेचौरमा बेनीबाट तोरीपानीतर्फ जाँदै गरेको ना।५ ख ५७२४ नम्बरको बस दुर्घटना हुँदा बसमा सवार १६ जना घाइते भएका छन् । घाइतेहरुको जिल्ला अस्पताल म्याग्दीमा उपचार भइरहेको छ । बस चालकलाई प्रहरीले नियन्त्रणमा लिएको छ ।
यसैगरी धनुषा नगराईन तीनगाछियामा ना.३ ख २९८६ नम्बरको बसले ज.९ प ४१८२ नम्बरको मोटरसाइकललाई ठक्कर दिँदा मोटरसाइकलमा सवार भारत मधुवनी बस्ने ४० वर्षीय सुरेन्द्र यादवको मृत्यु भएको छ ।
उक्त बस नगराईनबाट जनकपुरतर्फ जाँदै गरेको थियो । दुर्घटनामा घाइते भएका मोटरसाइकल चालकको जनकपुर अंचल अस्पतालमा उपचारको भइरहेको छ । बस चालकलाई प्रहरीले नियन्त्रणमा लिएको छ ।
त्यस्तै रामेछाप मन्थली पुरानोगाउँमा बा.५१ प ६३६५ नम्बरको मोटरसाइकल दुर्घटना हुँदा चालक खाँडादेवी बस्ने २३ वर्षीय लोप्साङ लामाको घटनास्थलमै मृत्यु भएको छ ।
दुर्घटनामा घाइते भएका मोटरसाइकलमा सवार पुरानोगाउँ बस्ने खड्क बहादुर श्रेष्ठको १२ वर्षीय छोरा चोक कुमार श्रेष्ठको उपचारको लागि लैजाने क्रममा बाटोमै मृत्यु भएको छ ।
यसैगरी सर्लाही हरिवन मुसलमान टोलमा ना.३ ख ५६१५ नम्बरको ट्रकले ठक्कर दिँदा सोही स्थान बस्ने शेख मेराजु बिनको १६ वर्षीय छोरा शेख खुस्बु बिनको मृत्यु भएको छ । ठक्करबाट गम्भीर घाइते भएका उनको उपचारको लागि वीरगंजतर्फ लैजाने क्रममा बाटोमै मृत्यु भएको हो । ट्रक चालक प्रहरीको नियन्त्रणमा छन् ।
नवलपरासी(पुर्व) बिनयीत्रिबेणी ज्यमिरेमा ना.४ ख ४९७६ नम्बरको ट्रकले ना.६ ख ४८०८ नम्बर र ना.५ ख ३८७१ नम्बरका ट्रकलाई ठक्कर दिँदा ना.४ ख ४९७६ नम्बरको ट्रक र ना.५ ख ३८७१ नम्बरको ट्रकका सहचालक गरी २ जना घाइते भएका छन् । घाइतेहरुलाई उपचारको लागि पुरानो मेडिकल कलेज भरतपुर लगिएको छ । ठक्कर दिने ट्रकका चालक फरार रहेकोले प्रहरीले खोजी गरिरहेको छ ।
दुर्घटना भएका सबै स्थानमा तत्काल खटिई गएका स्थानीय प्रहरीले उद्दार कार्य गर्नुका साथै आवश्यक अनुसन्धान समेत गरिरहेको प्रहरीले जनाएको छ ।
वि.सं.२०७६ वैशाख २६ बिहीवार १६:०५ मा प्रकाशित
