हामी सबैकाे संसारन्यूज

सपना देख्नु नै अनुचित होइन ठूलो यात्राको
दरिलो अठोट छ भने हाम्रो प्रत्येक ध्येयमा
सपना त महाकल्पना बन्छ कुनै ठूलो यात्राको
हरेक महान यात्रा त आखिर
सुन्दर सपनाबाटै त सुरु हुन्छ

घोषणा गर्नु नै बेठिक होइन ठूलो कार्यको
भरिलो इमान छ भने हाम्रो हरेक वचनमा
घोषणा त महाकबोल हुन्छ कुनै ठूलो कार्यको
हरेक महान कार्य त आखिर
सुन्दर घोषणाबाटै त सुरु हुन्छ

पर्वत नै पञ्छाइ छोड्ने ऐलान पनि बेठिक होइन
प्रयास जारी राखिन्छ भने निरन्तर जोशपूर्वक
त्यस्तो कुनै पर्वत हुँदैन जो खनेर कहिल्यै सकिन्न
हरेक पर्वत पञ्छाउने काम पनि त आखिर
पहिलो ढुंगा खनाइबाटै त सुरु हुन्छ

सागर नै छिचोल्ने आकांक्षा पनि अनुचित होइन
जस्तोसुकै जोखिम मोल्ने आँट गरिन्छ भने होशपूर्वक
त्यस्तो कुनै सागर हुँदैन जो ख्याएर कहिल्यै सकिन्न
हरेक सागर छिचोल्ने काम पनि त आखिर
पहिलो डुंगा खियाइबाटै त सुरु हुन्छ