३१ बैशाख, झापा । तपाईको आफ्नो मान्छे वा साथीभाइ प्रहरी, आर्मी, सशस्त्र वा अन्य सरकारी अड्डामा हुनुहुन्छ र तपाई भेटघाटका लागि त्यहाँ पुग्नु भएको छ भने उनीहरुको व्यक्तिगत कुर्सीमाथि त्यो पनि नाम र पद लेखिएको नेम प्लेट भएको ठाउँमा बसेर फोटो खिच्ने भुल नगर्नुहोला ।
अहिलेको सामाजिक संजालको प्रभाव तथा जे गरेपनि तत्काल सेल्फी या फोटो खिचाएर पोस्ट गरिहाल्ने चलनका कारण तपाइलाई पनि त्यस्तो कुर्सीमा बसेर फोटो खिच्न मन लाग्ला । अनि फोटोकतिखेर सामाजिक संजालमा राखौं र कमेन्ट तथा लाइक बटुलौं भनेर मनमा हुटहुटी पनि चल्ला । अनि फुर्सद र इन्टरनेट पाउनासाथ फोटो सामाजिक संजालमा अपडेट गरिहाल्नु पनि हुन्छ । तर त्यसले तपाईलाई त आपतमा पार्छ नै साथै तपाईको आफन्त वा साथीभाइ पनि कारबाहीमा पर्न सक्छन् ।
यस्तै घटना भएको छ झापामा । झापा अनारमनि इलाका प्रहरी कार्यालयका डीएसपी सुवास खड्का आफ्नो कार्यस्थलमा नभएका बेला उनको कुर्सीमा बसेर फोटो खिच्ने ३० वर्षीय हर्कराज गुरुङ पक्राउ परेका छन् ।
उनलाई साइबर कानुन अन्तर्गतको कारबाही गरिएको अनारमनी इलाका प्रहरी कार्यालयका इन्सपेक्टर सुनिल कुमार श्रेष्ठले संसारन्युजलाई बताएका छन् ।
श्रेष्ठका अनुसार आफ्नो कामको लागि प्रहरी कार्यालय अनारमनिमा पुगेका गुरुङले डिएसपी खड्का बाहिर निस्किएको मौका पारेर कुर्सीमा बसेर नेम प्लेट र प्रहरी झण्डा टेबुलमाथि राखेर तस्बिर खिचेका थिए ।
गुरुङको यस्तो हर्कतले डीएसपी सुवास खड्कालाई समेत सोधपुछका लागि जिल्ला प्रहरी कार्यालय विराटनगरमा बोलाइएको बताइएको छ ।
वि.सं.२०७६ वैशाख ३१ मंगलवार ११:२६ मा प्रकाशित
