हामी सबैकाे संसारन्यूज

केही थान रहर,केही थान आशा
केही गाँस भोक, केही थान कपास
चुहिएको छानाको जोहो
बस न्यून आधारलाई थेग्न
मात्र एकसरो भरोसा बोकेर
सुस्ताउँदै छ नयाँ वर्ष

कहिले भूकम्पले चर्काएको मन
कहिले बाडीले बगाएको विश्वाश
कहिले हुरीले उडाएको सपना
एक माथि एक चाङ् लगाउँदै
अस्तव्यस्त भएको भरोसा तुन्दै
एउटा नयाँ आयाम
शायद बन्दै छ नयाँ वर्ष
लम्बाइ चौडाइ नमिलेको सम्वृद्धिको आयतन भित्र
रोपिन्छ बालुवामा सुशासनका अवधारणा
घोपिन्छ आस्थामा बिखन्डनका छुरा
अनि बलात्कृत हुन्छन् मन्दिर पुजारीबाट
लुटिन्छ फूलको वासना बागबाट
र निस्सासिन्छ माटो
तर
आवाज बिहिन निमुखाहरुको भिडमा
एउटा चर्को आवाज निरन्तर चिच्याउँछ
नयाँ वर्ष नयाँ आयाम बोकेर आउँछ
सम्वृद्धि र सुशासन बोकेर आउँछ
अनि
निःशब्द दुखेका घाउ सुम्सुमाउदै
अनयासै बगेका सपना पुछ्दै
हाँसोको अभिनय गर्छ
नयाँ वर्ष