हामी सबैकाे संसारन्यूज

१० जेठ, काठमाण्डौं । पर्वतमा विहिबार आएको असिना र पानीले पर्वतका झण्डै १० हजार किसानका उत्पादनमा क्षति पुगेको छ ।

विहिबार दिउँसो झण्डै २ घण्टा आएको भिषण असिना र पानीले मोदी गाउँपालिकाका बाजुङ, राम्जा, चित्रे, तिलाहार, आर्थर पकुवा लगायतका गाउँमा किसानले उत्पादन गरेको मकै फलफूल तरकारी लगायतका बालीमा क्षति पुगेको हो ।

‘मकै भर्खर पसाउने बेला भएको थियो, सबै सखाप भयो,’ नेकपाका केन्द्रीय सदस्य पर्वतका गुप्त बहादुर हमालले संसारन्युसँग भने, ‘यो वर्ष यहाँका किसानले मकै खान नपाउने भए ।’
हमालका अनुसार मकै र तरकारी मात्र नभएर धानको बिउँ पनि सबै सखाप पारेको छ । ‘लेकतिर धान छिटो रोप्छन्, धानको बिउँ पनि सबै सखाप बनायो ।’ हमालले भने ।
त्यसैगरी पर्वतका सांसद पदम गिरीले किसानका राहतका लागि आफूले सम्बन्धीत निकायमा पहल गरिरहेको जानकारी दिएका छन् ।

उनले मोदी गाउँपालिकाका अध्यक्षलाई पीडित किसानको लागत संकलन गर्नका लागि आग्रह गरिसकेको र जिल्ला कृषि कार्यालय, प्रदेश कृषि मन्त्रालयमा किसानका समस्या राखिसकेको र क्षतिपूर्तिको लागि पनि पहल गरिसकेको संसारन्युजलाई बताए । ‘इतिहासमै पहिलोपटक भिषण असिना पानीले यसरी बितण्डा मच्याएको हो,’ सांसद गिरीले भने, ‘ सबै किसानका के कति क्षति भयो सबै लागत आएपछि क्षतिपूर्तिको पहल गर्छौ ।’ गिरीका अनुसार केन्द्र सरकारसँग पनि क्षतिपूर्तिका लागि पहल गरिने छ ।