हामी सबैकाे संसारन्यूज

२९ कात्तिक, ढाका । बङ्गलादेशको सबैभन्दा ठूलो विपक्षी दलले देशभरी सोमबार विरोध प्रदर्शनको आयोजना गर्ने भएको जनाएको छ ।

यस महिनाको सुरुतिर, पूर्व प्रधानमन्त्री बेगम खालिदा जियाको दल बङ्गलादेश नेसनल पार्टी (बीएनपी) ले ढाकाको एक चल्तीको हरित पार्क “सुहरावर्ती उद्यान” मा ¥याली र आमसभाको आयोजना गर्न स्वीकृति पाउनका लागि ढाका महानगरीय प्रहरी प्रशासनसमक्ष अनुरोध गरेको थियो ।

उक्त अनुरोध अस्वीकार गरिएको विरोधमा देशभरी प्रदर्शनको आयोजना गरिएको बीएनपी कार्यालयका महासचिव मिर्जा फाकरुल इस्लाम आलमगिरले आइतबार आयोजित एक पत्रकार सम्मेलनमा बताए ।

“सत्तारुढ दल हामीदेखि डराएको छ, उसैको इसारामा ढाका महानगरीय प्रहरीले सार्वजनिक स्थलमा पनि हाम्रो पार्टीको जुलुस र आमसभा गर्न दिएन” बीएनपी महासचिव मिर्जाको भनाइ थियो ।

पूर्वप्रधानमन्त्री खालिदा जियाको दल बीएनपीको नेतृत्वमा विपक्षी गठबन्धनले वर्तमान सरकारको राजीनामा, एक अन्तरिम चुनावी सरकारको गठन र ताजा आमनिर्वाचनको माग राख्दै धेरै महिना अघिदेखि व्यापक विरोध प्रदर्शन गर्दै आइरहेको छ । सिन्ह्वा