हामी सबैकाे संसारन्यूज

१५ जेठ, काठमाडौँ । नारायणहिटी दरवार संग्रालय परिसरमा सुरक्षाकर्मीको मानमर्दन हुनेगरी गणतन्त्र स्मारक बनाएको पाइएको छ । बुधबार राष्ट्रपति विद्यादेवी भण्डारीबाट उद्घाटन हुन लागेको स्मारकमा सशस्त्र द्वन्दकालमा भएका बेपत्ता तथा हत्याका घटनामा सेना – प्रहरीको संलग्नता भत्काउने गरी कुँदिएका तस्बिर समावेश गरिएका छन् । त्यसप्रति नेपाली सेनाका अधिकारीहरुले गम्भीर आपत्ति जनाएका छन् ।

नेपाली सेनाका परामाधिपति (राष्ट्रपति) बाटै उद्घाटन हुने गणतन्त्र स्मारकमा राज्यका सुरक्षाकर्मीकै मानमर्दन हुनेखालका सामग्री समावेश हुनु गम्भरि आपत्तिको विषय हो,’ नाम नबताउने सर्तमा एक उच्च सैनिक अधिकारीले नागरिकसँग भने, ‘ द्वन्दमा ज्यान गुमाएका सूरक्षाकर्मीलाई चाहिँ अपराधी, गैरकानुनी र हिंसात्मक गतिविधिमा संलग्नलाई चाहिँ सहिद बनाएर स्मारक तयार हुनु गलत हो ।’ स्मारक उद्घाटन कार्यक्रममा प्रधानसेनापति पूर्णचन्द्र थापासहतका उच्च सैनिक अधिकारी समेत उपस्थित हुँदैछन् । सहरी विकास मन्त्रालयले तयार पारेको स्मारकका चारवटै किनारका खम्बामा माओवादी शसस्त्र द्घन्द्घका क्रममा बेपत्ता पारिएका, अंगभंग भएका, ज्यान गुमाएका तथा मारिएका घटनाका झल्काउने किसिमले कुँदिएका तस्बिर समेटिएका छन् ।

आजको नागरिक दैनिक पत्रिकाबाट