हामी सबैकाे संसारन्यूज

१६ जेठ, काठमाडौँ । धुर्मुस सुन्तली फाउण्डेसनले भरतपुर महानगरपालिका वडा नं १५ रामपुर शान्तिचोकमा निर्माणाधिन गौतमबुद्ध अन्तर्राष्ट्रिय क्रिकेटस्थल स्थगित गरेको छ । बुधबार स्थानीयले डोजर लगाएर फाउण्डेसनको बार भत्काइदिएपछि रङ्गशाला निर्माण स्थलमा उचित कार्य बाताबरण सिर्जना नभईन्जेल सम्मका लागि निर्माण स्थगित गरिएको फाउण्डेसलने प्रेस विज्ञप्तीमार्फत जानकारी गराएको छ ।

फाउण्डेसनका अध्यक्ष सीताराम कट्टेलद्वारा जारी विज्ञप्तीमा अत्यन्त उत्साहका साथ बनिरहेको परियोजनामा केही उच्छृङखल समूहबाट डोजर प्रयोग गरी तहस नहस बनाइएको भन्दै त्यसकार्यको घोर भत्सर्ना गरिएको छ ।

डिपीआर पश्चात महानगर, एएफयु र फाउण्डेसनको पश्चिमतर्फको बाटोको विषय तय गर्ने अवस्था छँदाछँदै परियोजना भित्रको सुरक्षाको स्थिति र कार्यवातावरण तयार गर्न लगाइएको अस्थायी बार सुनियोगित रुपमा स्थानीयमा भ्रामक दुश्प्रचार गरिएको विज्ञप्तीमा उल्लेख छ ।

बुधबारको घटनाबाट कार्यवातावरण, कर्मचारी, कर्मचारीको जिउ ज्यान र भौतिक सम्पत्तिको सुरक्षाको विषयमा खतरा र गम्भिर परिस्थिति श्रृजना भएको भन्दै सो सम्बन्धमा स्थायी समाधान र कार्यावातावरण तयार नभएसम्मका लागि परियोजनाको कामकारवाही स्थगित गरिएको उल्लेख छ । यसबाट पर्न गएको असुविधा प्रती सम्पुर्ण सहयोगी मनहरु, शुभचिन्तक लगायत आम नेपालीहरुमा क्षमाप्रार्थी छौ, विज्ञप्तीमा भनिएको छ ।