हामी सबैकाे संसारन्यूज

२२ जेठ,नुवाकोट । मुसलमानको पुरानो बस्ती रहेको त्यहाँको त्रिशूलीका मुसलमानले हर्षाेउल्लासका साथ इद मनाइरहेका छन् ।

इस्लाम धर्मावलम्बीको महान पर्व इद उल फित्रका अवसरमा जिल्लामा विभिन्न स्थानमा छरिएर रहेका मुसलमानले आज त्रिशूलीको इदगाहमा भेला भई सामूहिक नमाज पाठ गरेका छन् ।

व्यापार व्यवसायका सिलसिलामा नुवाकोट जिल्लाका देवीघाट, छहरे, वेत्रावती, सामरी, आप्रँह र चोकदे र रसुवा जिल्लालगायत क्षेत्रमा छरिएर रहेका मुसलमानहरु सामूहिक नमाज पाठ गर्न इदगाहमा भेला भएको स्थानीयवासी मोहमद मियाले जानकारी दिए ।

त्रिशूलीमा दुई सय पचास वर्ष अघिदेखि बसोबास गरिरहेका मुसलमानले जिल्लाकोे एक मात्र इदगाहमा भेला भई सामूहिक नमाज पाठ गर्दै एक महिनासम्मको रमजान रोजा उपवास सकिएको खुशीयालीमा एकार्कासँग आलिङ्गन गर्दै इद मुबारक साटेको मौलना अब्दुल बहावले जानकारी दिए ।

तीन दिनसम्म हर्षाेउल्लासपूर्वक मनाइने सो पर्वका अवसरमा मुसलमान समुदायले विशेषतः ‘सेवई’ को परिकार आफन्त र छरछिमेकीलाई खुवाउने चलन छ ।

नमाज पाठपछि उनीहरुले दानसमेत गरेका । मुसलमानले इदका अवसरमा कमजोर आर्थिक अवस्था भएकाहरुलाई आफ्नो कमाइको १० प्रतिशत दानसमेत गर्ने चलन छ । रोजा, नमाज, जकात, हज र फित्तरा पाँच आधारभूत कुरा मुसलमानका लागि महत्वपूर्ण भएको मौलना बहावले बताए ।