हामी सबैकाे संसारन्यूज

३० जेठ । नेपाल कम्युनिष्ट पार्टी (माक्र्सवादी–लेनिनवादी)ले सरकारले संघीय संसदमा पेश गरेको गुठी सम्बन्धी विधेयक २०७५ भूमाफीया र पश्चिमा स्वार्थको हितमा रहेको भन्दै फिर्ता लिन माग गरेको छ ।

पार्टीका महासचिव सीपी मैनालद्वारा जारी प्रेस विज्ञप्तीमा विधेयक भूमाफीया र पश्चिमा स्वार्थमा रहेको उल्लेख गरिएको छ । विधेयकको २३ नम्बरको प्रावधानमा गुठीको हक र दायित्व प्राधिकरणमा सार्ने र २४ नम्बरको प्रावधानद्वारा गुठीयारको अधिकार स्वतः समाप्त हुने व्यवस्था प्रति पार्टीको असहमति रहेको जनाइएको छ ।

बालुवाटार लगायतका सरकारी जग्गा भूमाफीया र कर्मचारीको मिलीमतोमा व्यक्तिको हातमा गईरहेको सन्दर्भ जोड्दै अव्यवस्थित रहेका गुठीका जग्गाको ब्यवस्थापनमा सुधार गर्नुको सट्टा प्राधिकरणमा ल्याउने सरकारको नीतिले भूमाफीयाहरूको हित गर्ने उल्लेख छ ।

त्यस्तै नेपाली सँस्कृति र परम्परालाई जसोतसो धानीरहेका गुठीहरूको स्वामित्वबाट गुठीयारहरूलाई बञ्चित नेपाली संस्कृति परम्परा कमजोर हुने भन्दै अबिलम्ब फिर्ता लेओस् भनी माग गरिएको छ ।

विधेयकको विरोधमा गुठीयारहरूले काठमाण्डौमा गरेको शान्तिपूर्ण प्रदर्शनमा भएको हस्तक्षेपको निन्दा गर्दै आन्दोलनप्रत्रि समर्थन र ऐक्यवद्धता रहेको जनाइएको छ ।