हामी सबैकाे संसारन्यूज

८ असार, लहान । राम्रो काम लगाइदिन्छु भन्ने दलालको पछि लागेर गएका पाँचजना दलित किशोरलाई मुम्बईमा बन्धक बनाईएको छ । सिरहाका दुई, सप्तरीका दुई र उदयपुरका एक किशोरलाई बन्धक बनाइएको हो ।

यसरी बन्ध्क बनाइएकामा लहान–१५ लंग्राहाका राजकुमार सदायका छोरा १६ वर्षीय सरोज सदाय र १४ वर्षीय विजय सदाय, सप्तरी प्रीतमपुरका १५ वर्षीय ललकु सदाय र १४ वर्षीय प्रमोद सदाय तथा उदयपुर गाईघाटका १५ वर्षीय अक्षय सदाय छन् । उनीहरुलाई पछिल्लो नौ महिनादेखि परिवारसँग कुरा समेत गर्न नदिएको मुम्बईमा बन्धक बनेर फर्किएकामध्येका ३३ वर्षीय जितन सदायले भने । मुम्बई पुगेको एक महिनामै भागेर फर्किएका उनी लग्राका हुन् ।

मुम्बईमा हामीलाई ‘दास’ सरह काममा जोताइएको र परिवारसँग सम्पर्क गर्न नदिएकोलले भागेर फर्केको जितन सदायले बताए । आफूहरुलाई ट्रकबाट ल्याइएको समान लोड अनलोड गर्न लगाइएको उनको भनाई छ । ‘बिहान ५ बजेदेखि मध्यरातसम्म काममा जोताइयो,’ उनले भने, ‘ खान पनि राम्रोसँग दिइएन ।’ उनले ज्यान जोगाउनकै लागि भागेको बताए ।

उनीहरुलाई काम गर्न भनेर भारत लगेका लाहान १३ सरस्वती गाउँका करिब ४० वर्षीय रवि महतोले उनीहरुलाई दलालको जिम्मा लगाएर मोटो रकम लिएर फर्किएको आइतबारको नयाँपत्रिका दैनिकमा समाचार छ ।

यसैविषयमा इलाका प्रहरी कार्यालय लहानका प्रमुख प्रहरी नायब उपरीक्षक भेषराज रिजालले रवि महतोविरुद्ध प्रहरीमा उजुरी परेको बताए ।