हामी सबैकाे संसारन्यूज

१७ असार, नर्वे । गैरआवासीय नेपाली संघ (एनआरएनए) नर्वेको छैटौ राष्ट्रिय अधिबेशन सम्पन्न भएको छ ।
ओस्लोको सेरेन बुल्स भेईको हलमा जुन २९ मा सम्पन्न भएको अधिबेशनको उद्घाटन प्रमुखअतिथि एवं यूरोप क्षेत्रीय संयोजक शिव कुमार बरुवाल र राष्ट्रिय समन्वय परिषद नर्वेका अध्यक्ष संजीव कुमार थापाले पानसमा बत्ती बालेर गरेका थिए ।
प्रथम उपाध्यक्ष शालिग्राम अर्यालको स्वागत मन्तव्य रहेको उक्त राष्ट्रिय अधिवेशनको प्रथम चरणको औपचारिक कार्यक्रममा राष्ट्रिय समन्वय परिषद, नर्वेका सल्लाकारहरु, अग्रज व्यक्तित्वहरु र विभिन्न संघ संस्थाका प्रमुखहरुले अधिवेशनको पूर्ण सफलताको कामना गरेका थिए ।
प्रमुख अतिथि एवं क्षेत्रीय संयोजक शिव कुमार बरुवालले झन्डै ८० वटा राष्ट्रमा संघको राष्ट्रिय समन्वय समितिहरु रहेको जानकारी गराउदै नेपालको समृद्धिको लागि परोपकारी काम मात्रै पर्याप्त नभएको र एनआरएनहरुको प्रत्यक्ष लगानी, शिप र दक्षताको आवश्यकता रहेको बताएका थिए ।

त्यस्तै दोश्रो चरणको बन्दसत्रमा महासचिव राजु अर्यालले बार्षिक प्रतिबेदन पेश गरेका थिए भने कोषाध्यक्ष बिना नेवार श्रेष्ठले प्रस्तुत गरेको आर्थिक प्रतिबेदनमा सामान्य परिमार्जन सहित सर्बसम्मत रुपमा पारित गरिएको थियो ।
त्यस्तै विधान संशोधन समितिको तर्फबाट आइसीसी सदस्य द्वारिका महर्जनले प्रस्तुत गरेको विधान संशोधनका प्रस्ताबहरुमा अधिवेशनमा उपस्थित सदस्यहरुबी गहन छलफल भई विधान संशोधनका प्रक्रिया सम्पन्न गरिएको थियो ।

जून ८ मा हुने भनिएको राष्ट्रिय समन्वय परिषद, नर्वेको छैटौ राष्ट्रिय अधिवेशन सम्पन्न गर्न असम्भव भएपछि स्थगित गरिएको बताइएको छ ।
राष्ट्रिय अधिवेशनको निर्वाचन प्रक्रियालाई लिएर भएको आलोचना, बिरोध र असन्तुष्टीहरुलाई सम्बोधन गर्दै छलफल र समस्या समाधानका लागि धेरै प्रयासहरु पनि भएका थिए । यूरोप क्षेत्रीय संयोजकको सहयोग र सल्लाह अनि पहलमा विभिन्न चरणमा सहमतिका प्रयासहरुपछि नयाँ कार्यसमिति निर्माण नयाँ प्रक्रियाबाट पूनः शुरु गर्ने निम्न बमोजिमको निर्णयहरु सहित छैटौ राष्ट्रिय अधिवेशन सम्पन्न गरिएको हो ।

२०१९ जून ८ मा हुने भनिएको अधिवेशनको लागि गठन गरिएको निर्वाचन समितिलाई अधिवेशनमा धन्यवाद सहित बिदाइ गर्दै ५ सदस्यीय नयाँ निर्वाचन समिति गठन गरिएको छ ।
डा. सुरज थापा संयोजकत्वमा प्रो, डा. बिशाल कुमार सिटौला, नबराज गुरुङ, सन्तोष बानिया र मनिष बुढाथोकी सदस्य रहेको नयाँ कार्यसमितिलाई पुन ः नयाँ प्रक्रियाबाट निर्वाचन सम्पन्न गराउनका लागि जिम्मेवारी दिइएको छ ।

सोहि अवसरमा अध्यक्ष संजीव कुमार थापाले प्रस्तुत गरेको नयाँ निर्वाचन समितिको प्रस्तावलाई अधिवेशनमा उपस्थित सदस्यहरुले पारित गरे पश्चात उनीहरुले वर्तमान कार्यसमिति बिघटन गरिएको घोषणा गरेका थिए ।
निर्वाचन सम्पन्न गरि नयाँ कार्यसमिति निर्माण नभएसम्म सोहि कार्यसमितिले कार्य सम्पादन गर्ने निर्णय पनि अधिवेशनमा गरिएको थियो ।
संजीव कुमार थापाको अध्यक्षता रहेको कार्यक्रममा संस्थाका महासचिव राजु अर्यालको संचालन रहेको थियो भने झण्डै २०० भन्दा माथि पंजीकृत सदस्यहरुको उपस्थिति रहेको थियो ।