हामी सबैकाे संसारन्यूज

१९  असार, ढाका ।  बङ्गलादेशको एक तयारी पोशाक उद्योगमा बुधबार भएको भिषण आगलागीका कारण छ जनाको ज्यान गएको प्रहरीले जनाएको छ ।

राजधानी ढाकाबाट नजिकैको श्रीपुरमा रहेको विशाल कारखानामा लागेको आगो नियन्त्रणमा ल्याउन १२ घण्टाभन्दा बढी समय लागेको थियो । बङ्गलादेशमा असावधानीका कारण तयारी पोशाक कारखानाहरूमा बारम्बार आगलागीका घटना हुने गरेका छन् ।

मङ्गलबार राति शुरु भएको आगो नियन्त्रणमा ल्याउन पानीको अभाव भएको स्थानीय अग्निनियन्त्रक प्रमुख अख्तर उज जमानले बताए ।

अख्तरले घटनास्थलबाट छ जनाको शव निकालिएको जानकारी दिए ।

आगलागीबाट उद्योग परिसरमा रहेका आधाभन्दा बढी भवनहरूमा क्षति पुगेको छ । क्षतिग्रस्त भवनमा अरू पीडितको खोजी कार्य जारी रहेको अधिकारीहरूले बताएका छन् ।

चीनपछि विश्वमै तयारी पोशाक उत्पादन गर्ने दोस्रो ठूलो मुलुक बङ्गलादेश हो । तर उद्योगमा नियमितझैँ आगलागी र अरू दुर्घटना हुने गरेको भन्दै आलोचना हुने गरेको छ । सन् २०१३ मा राना प्लाजा घटनामा एघार सयभन्दा बढीको ज्यान गएको थियो ।

ढाकामै गत मार्चमा एक कार्यालय भवनमा आगलागी हुँदा २६ जनाको ज्यान गएको थियो ।