७ साउन, काठमाडौँ । असार २८ र २९ गतेको वर्षापछि आएको बाढीले महोत्तरीमा बालबालिकालाई लगाउन तयार राखिएको भ्याक्सिन बिगारेको छ ।
महोत्तरी स्वास्थ्य कार्यालयभित्र पसेको पानीले त्यहाँको स्टोरमा राखिएका विभिन्न प्रकारका आठ हजार तीनवटा खोप डुबेको हो । ठूलो मात्रामा भ्याक्सिन नष्ट भएपछि साउन ११ गतेदेखि लगाइने नियमित खोप प्रभावित हुने देखिएको हो ।
परिवार कल्याण महाशाखाका खोप अधिकृत भरत भण्डारीले बाढीका कारण ठूलो परिमाणमा भ्याक्सिन बिग्रिएको बताए । ‘एक महिनाका लागि भ्याक्सिन भण्डारण गरिएको थियो,’ उनले भने,‘अधिकांश बिग्रेका छन् ।’ उनका अनुसार स्टोर तीन फिटसम्म डुबेको थियो ।
बाढीबाट जिल्ला स्वास्थ्य कार्यालयमा रहेका १० वटामध्ये सातवटा रेफ्रिजेरेटर बिग्रेका छन्, हाल तीनवटा मात्रै रेफ्रिजेरेटर सञ्चालनमा रहेको भण्डारीले बताए । मंगलबारको नयाँ पत्रिका दैनिकबाट
