मन भरिको माया
आँखा भरिको सपना
मारेर
तिमीले भन्यौ
माइली..!
समय बदलिएको छ
उल्लास र आशाहरु बदलिएको छ ।
सुनसान जहाँ बेमत्लवी हिसाब हुन्छ
हो यही बेला
मेरो देश दुखेको छ
मेरो भेष दुखेको छ
मेरो नाम दुखेको छ
तिम्रो काम र दाम दुखेको छ
मेरो मेची देखि काली दुखेको छ
तिम्रो चप्पल देखि सारी दुखेको छ
मेरो टिष्टा र काङ्गडा
सतलज र ब्रम्हपुत्र दुखेको छ ।
तिमीलाई
तिम्री आमा र सन्तान दुखेको छ
हो माइली ..
तिमी उहीँ म उहीँ
समय बदलिएको छ
मेरो घण्टाघर दुखेको छ
धरहरा दुखेको छ ।
तिम्रो घर थर,
माई गाई र दाइहरु दुखेका छन्
अनि
आमा र सानीमाहरु दुखेका छन्
यो बेला तिम्रो र मेरो दुखाइ फरक छ
हो माइली
तिमी उहीँ म उहीँ
समय बदलिएको छ ।
मेरो देशको सुगन्धित
बासना हराउँन सक्छ
बगैंचामा हत्याकाण्ड मच्चिएको छ
त्यसैले
तिम्रो र मेरो जिम्मेवारी फरक छ
झण्झट बराबरी होला
गुनासो नगर माइली
तिमी उहीँ म उहीँ
समय बदलिएको छ ।
हाल, काठमाण्डौ
