हामी सबैकाे संसारन्यूज

१९ साउन, काठमाण्डौं । पूर्व प्रधानमन्त्री तथा नेकपाका वरिष्ठ नेता माधब कुमार नेपाल र नवनियुक्त संस्कृति, नागरिक उड्डयन तथा पर्यटनमन्त्री योगेश भट्टराई बैठकमै रोएका छन् ।

आईतबार सिंहदरबारमा आयोजित अन्तराष्ट्रिय सम्बध समितिद्धारा आयोजना गरिएको मन्त्री भट्टराई स्वागत गर्ने क्रार्यक्रममा वरिष्ठ नेता नेपाल र भट्टराई भक्कानो छोडेर रोएका हुन् ।

बैठकमा पूर्वप्रधानमन्त्री नेपालले पर्यटनमन्त्रीको जिम्मेवारी कुशलतापूर्वक निभाउन भन्दै दिएको सुझावपछि मन्त्री भट्टराईले वरिष्ठ नेता नेपाल आफ्नो नेता मात्र नभएर गुरु नै भएको बताउँदै २०४३ सालको घटना स्मरण गरेका थिए । उनले रुदै आफू मृत्युको मुखमा पुगेका बेला नेता नेपालले दिएको ढाडस र स्पर्शले आफूले बाँच्ने शक्ति पाएको भन्दै सुकसुकाएका थिए ।
उता नेता नेपालले पनि दुवै हातले आँखा छोप्दै आँसु पुछ्न थालेपछि बैठकमा सहभागी अन्य पनि मलिन अनुहार बनाउँदै आँखाभरी आँसु बनाएका थिए ।

२०४३ सालको निर्वाचनलाई जनपक्षीय उम्मेदवारद्धारा उपयोग गर्ने पार्टीको नीति अनुरुप भट्टराई काठमाण्डौंमा खटिएका थिए । खाने बस्ने ठेगान नभएका बेला उनी एक्कासी बिरामी भएको र टिचिङ अस्पतालमा उपचारका लागि भर्ना भएको मन्त्री भट्टराईले सोहि कार्यक्रममा स्मरण गरेका थिए ।

झण्डै दुईमहिना अस्पतालमा बस्दा डाक्टरले बाँच्ने आसा मारिसकेको अवस्थामा नेता नेपाल अस्पतालमा भेट्न आएको र उनको एक स्पर्शले बाँच्ने शक्ति प्राप्त भएको पनि मन्त्री भट्टराईले बताएका थिए ।