२० साउन, काठमाडौँ । के तपाईका बालबालिका मोबाइलमा गेम खेल्ने, टिकटक बनाउने या भिडियो हेर्ने गर्छन् ? यस्तो धेरै मात्रामा गरे उनीहरुलाई मानसिक रोग ‘गेमिङ डिसअर्डर’ को समस्या हुनसक्छ । अहिले धेरैजसो बालबच्चा ‘गेमिङ डिसअर्डर’ को सिकार हुँदै गएको मनोविज्ञानहरुको भनाइ छ ।
मोबाइल गेममा बच्चाहरु लिप्त हुँदै जाँदा उनीहरु त्यहाँबाट बाहिर आउनै चाहँदैनन् । यही कारण ‘गेमिङ डिसअर्डर’ लाई अहिले विश्व स्वास्थ्य सङ्गठनले मानसिक रोगको श्रेणीमा राखेको मानसिक रोग विशेषज्ञ डा. प्रवास अधिकारीको भनाइ छ ।
उनले भने, “ जब बच्चाहरुमा यस्तो समस्या आउन थाल्छ ,उनीहरु निदाउन छाड्छन् । शारीरिक गतिविधिमा सक्रिय हुँदैनन् । खानपान अनियमित हुन थाल्छ । उनीहरु पारिवारिक र सामाजिक जीवनबाट भाग्न खोज्छन्।” यो अवस्थामा पुग्दा बालबालिका हिंसक र आक्रामक हुने बताउँदै उनले एकान्तमा मात्र बस्न रुचाउने, सधैँ उदास रहनेजस्ता समस्या देखिए अभिभावकले बैलैमा ध्यान दिन सुझाव दिए । सोमबारको गोरखापत्र दैनिकबाट
