२१ साउन, दमौली । बेलायतमा इन्जिनियरिङ पेशामा जम्दै गरेका तनहुँका प्रदीप मल्ल देश फर्केर आफनै गाउँमा माछापालनमा रमाउँदै छन् ।
तनहुँको माग्दे गाउँपालिकाका ६ का ३१ वर्षीय प्रदीप मल्ल आइटी इन्जिनियर हुन् ।
पाँचवर्ष अघि बेलायतबाट देश फर्केका मल्लले काठमाण्डौंमा आइटि इन्जिनियरिङको जागिर पनि खाएका थिए । तर, जागिरमा सन्तुष्ट बन्न नसकेपछि आफ्नै गाउँमा फर्केर माछापालन व्यवसायमा लागेका बताउँछन् ।
उनले काठमाण्डौंमा कन्सल्टेन्सी भने खोलेका छन् । त्यहाँ अरुलाई नै जिम्मा दिएर उनी गाउँमै माछापालनमा रमाएको मंगलरबारको गोरखापत्र दैनिकमा समाचार छ ।
उनले म्याग्दे गाउँपालिका ५ को भूलभूले भन्ने ठाउँको पृथ्वीराजमार्गसँगै जोडिएको आफ्नै १० रोपनी जग्गामा माछा पालन गरेका हुन् । नौ वटा पोखरी बनाएर माछापालन गर्ने योजना बनाएका उनले हाल दुई वटा पोखरीमा कमन कार्प र गैस कार्प जातिका माछा पालन गरेका छन् ।
आफू पनि दिनभर पोखरीमा व्यस्त रहने उनले ६ जनालाई रोजगारी दिएका छन् ।
मल्ललाई यो व्यवसायमा उनका बुवा विष्णु कुमार मल्लले सहयोग गरेका छन् । विष्णु कुमार तनहुँ उद्योग बाणिज्य संघ दमौली बजार एकाईका पूर्वअध्यक्ष समेत हुन् ।
वि.सं.२०७६ साउन २१ मंगलवार ०९:५० मा प्रकाशित