Sansar News
२२ साउन, काठमाण्डौं । भारतीय पूर्व विदेशमन्त्री शुष्मा स्वराजको ६७ वर्षको उमेरमा हृदयघातका कारण मृत्युभएको छ । पूर्वमन्त्री स्वराजको मंगलबार राति मृत्यु भएको हो ।
दिल्लीमा रहेको आफ्नै घरमा हृदयघात भएपछि लगत्तै एम्स अस्पतालमा लगिएपनि शुष्मालाई बचाउन नसकिएको बताइएको छ ।
मृत्यु हुनुभन्दा केही घण्टा अगाडि शुष्मा स्वराजले एउटा खुसीको ट्विट गरेकी थिइन् । त्यो ट्विट अहिले सामाजिक संजालमा भाइरल बनेको छ ।
उक्त ट्विटमा मन्त्री स्वराजले भारतीय प्रधानमन्त्री नरेन्द्र मोदीलाई सम्बोधन गर्दै भनेकी छन्, ‘प्रधानमन्त्रीजी तपाईलाई हार्दिक अभिनन्दन, म आफ्नो जीवनमा यहि दिन देख्ने प्रतिक्षा गरिरहेकी थिए ।’
उनले भारतीय संविधानको अनुच्छेद ३७० को सन्दर्भमा यस्तो ट्विट गरेकी थिइन् ।
स्मरण रहोस्, सोमबार भारत सरकारले जम्मु कश्मिरका लागि संविधानमा जारी गरिएको संविधानको धारा ३७० खारेज गरेको थियो ।
वि.सं.२०७६ साउन २२ बुधवार १०:०२ मा प्रकाशित
