हामी सबैकाे संसारन्यूज

९ अगस्त, बेलायत । अन्तराष्ट्रिय नेपाली साहित्य समाज (अनेसास) द्धारा आयोजित अन्तराष्ट्रिय नेपाली साहित्य सम्मेलन ६ बुँदे लन्डन घोषणापत्र जारी गर्दै सम्पन्न भएको छ ।

३ देखि ५ अगस्तसम्म बेलायतमा आयोजित सम्मेलनले नेपाली साहित्यको अन्तराष्ट्रियकरणका लागि स्तरीय कृतिहरुको चयन गरी विभिन्न भाषामा अनुवाद गर्ने कार्यलाई निरन्तरता दिने लगायतका ६ बुँदे घोषणापत्र जारी गरेको हो ।

यस्ता छन् घोषणापत्रका बुँदाहरु
१–नेपाली साहित्यको अन्तराष्ट्रियकरणका लागि स्तरीय कृतिहरुको चयन गरी विभिन्न भाषामा अनुवाद गर्ने कार्यलाई निरन्तरता दिने ।

२-विज्ञहरुसँग परामर्श गरी डायस्पोराका नेपाली साहित्यहरुको इतिहास तयार गर्ने ।

३-नेपाली भाषा साहित्यका विशिष्ट स्रष्टाहरुको पहिचान गरी सम्मानलाई निरन्तरता दिने ।

४- डायस्पोराका बालबालिकाहरुलाई नेपाली भाषा पठनपाठनको व्यवस्था गरी पाठ्यसामाग्रीलाई आवस्यकता अनुसार युगानुकूल तुल्याउने ।

५-अनेसास केन्द्रीय कार्य समितिले च्याप्टरहरुसँग आवस्यक समन्वय गरी च्याप्टर तथा आजीवन सदस्यहरुको तथ्यांक अध्यावधिक गर्ने ।

६-विभिन्न विश्वविद्यालय तथा सङ्घ संस्थाहरुसँग आवस्यक समन्वय गरी भाषा साहित्यको उन्नयनमा सहकार्य गर्नका लागि अनेसासलाई अनुसन्धान केन्द्रका रुपमा विकास गर्दै लैजाने ।
उक्त घोषणापत्र समितिमा समाजका बरिष्ठ उपाध्यक्ष प्रकाश पौडेल ‘माइला’ संयोजक तथा समल कुमार गुरुङ, लालगोपाल सुवेदी, राजकुमार पुडासैनी, राजेन्द्र श्रेष्ठ ‘राज’को लतिका जोशी र सन्ध्या पहाडि रहेका छन् ।

उक्त सम्मेलनमा केन्द्रीय ट्रष्टी तथा विभिन्न देशबाट झण्डै ६ दर्जनको हाराहारीमा सहभागी रहेको आयोजकले जनाएका छन् ।