हामी सबैकाे संसारन्यूज

नुवाकोटका पत्रकार शालिकराम पुडासैनीको आत्महत्या प्रकणरमा टेलिभिजन कार्यक्रम प्रस्तोता रवि लामिछाने र युवराज कँडेल हिरासतमा रहिरहेका बेला न्युज २४ का अर्का पत्रकारलाई अज्ञात समुहले ज्यान मार्ने धम्कि दिएको बताइएको छ ।

पुडासैनीले आत्महत्या गर्नुपूर्व रेर्कड गरिएको भनिएको भिडियो सार्वजनिक भएको अर्कोदिन चितवन प्रहरीले न्यूज २४ टेलिभिजनबाट ‘सिधा कुरा जनतासँग’ का कार्यक्रम प्रस्तोता लामिछाने, अर्का पत्रकार कंडेल र पुडासैनीले भिडियो रेर्कडमा नाम लिएकी अस्मिता कार्की नामकी युवतीलाई चितवन प्रहरीले हिरासतमा राखेको छ ।

यसैबीच रविका सर्मथकहरुले रविको रिहाईको माग र निष्पक्ष छानविन हुनुपर्ने माग गर्दै चितवन लगायत विभिन्न जिल्लामा आवाज उठाइरहेका बेला नुवाकोटमै न्युज २४ का संवाददाता रामहरि गजुरेललाई धेरै दिनदेखि अज्ञात समुहले चरित्र हत्या गर्ने र ज्यानमार्ने सम्मको धम्कि दिएको बताइएको छ ।

नुवाकोट प्रेस सेन्टर नेपालका अध्यक्ष समेत रहेका उनलाई साउन २९ गते देखिनै निरन्तर रुपमा यस्तो धम्कि आउन थालेको हो ।

ती समूहले गजुरेललाई सामाजिक संजालमार्फत् र टेलिफोनमार्फत् चरित्र हत्या गर्ने र आत्महत्या गर्न बाध्य बनाइदिने, परिवारका सदस्य तथा बच्चाको अपहरण गरिदिनेलगायतका धम्कि दिइरहेको बताइएको छ ।

आफूलाई सामाजिक संजाल र फोनबाट यस्ता धम्कि आइरहेकोले आफूले प्रहरीमा उजुरी दिने तयारीमा रहेको गजुरेलले संसारन्युजसँग भने ।

‘धम्कि आइरहेको छ, अब प्रहरीमा सुरक्षाको माग गर्दै उजुरी दिने तयारीमा छु,’ गजुरेलले भने, ‘शालिकराम पुडासैनी मेरा पनि आफन्त हुन् पीडामा छु । तर, निष्पक्ष छानविन हुनुपर्छ भनिरहेको छु । सम्पूर्ण घटना रविजीमाथि छोड्दा असली अपराधि उम्कने हो कि भन्ने पनि लागिरहेको छ । ’

उनले रवि लामिछानेका विरुद्धमा लाग्नेहरुले रविको समर्थन नर्गन भन्दै धम्कि दिएको पनि बताएका छन् ।