हामी सबैकाे संसारन्यूज

८ भदौ, काठमाडौं । ईलाम र धनकुटामा भएका छुट्टाछुट्टै सवारी दुर्घटनामा २ जनाको मृत्यु भएको छ ।

ईलाम, ईलाम नगरपालिका–९ गोलाखर्कस्थित सडकमा को.१ त २२४५ नम्बरको ट्याक्टर अनियन्त्रित भई सडकबाट करिब ५ मिटर तल खसेर शनिबार दिउँसो दुर्घटना हुँदा चालक सोही स्थानका कृष्ण बहादुर लम्जेलको ट्याक्टरले च्यापिएर मृत्यु भएको हो ।

दुर्घटनामा घाइते भएका सोही स्थान निगुरे का २५ वर्षीया शान्ता बसेल र ८ वर्षीय बिजय बसेललाई उपचारको लागि जिल्ला अस्पताल ईलाम पठाइएको छ ।

त्यस्तै धनकुटा, साँगुरीगढी गाउँपालिका- ९ थाम्चुवास्थित सडकमा लु.४ त २६९९ नम्बरको ट्याक्टर सडकदेखि करिब ४० मिटर तल खसेर शनिबार साँझ दुर्घटना हुँदा चालक सुनसरी बराहक्षेत्र नगरपालिका- ८ मैनाबारीका राकेश चौधरीको घटनास्थलमै मृत्यु भएको हो ।

निर्माणाधिन तमोर करीडोरको लागि सिमेन्ट बोकेर ईटहरीबाट जादै गरेको सो ट्याक्टर राति अबेरसम्म आई नपुगेकोले सोही कन्स्ट्रक्सनका ठेकेदार पक्षका मानिसहरूले खोज्ने क्रममा उक्त ट्याक्टर दुर्घटना भएको अवस्थामा र चालक मृत फेला परेका थिए ।

दुर्घटनाका सम्बन्धमा स्थानीय प्रहरीले आवश्यक अनुसन्धान गरिरहेको बताइएको छ ।