१० भदौ, काठमाण्डौं । यसवर्षको पद्मश्री साहित्य पुरस्कार निबन्धकार रमेश सायनको ‘छुटेका अनुहार’ र पद्मश्री साधना पुरस्कार इतिहासविद् डा. महेशराज पन्तलाइ प्रदान गरिने भएको छ ।
खेमकला हरिकला लामिछाने समाज कल्याण प्रतिष्ठानद्धारा २०७५ सालको साहित्य पुरस्कार निबन्धकार रमेश सायनको संस्मरण छुटेका अनुहारलाई दिइने निर्णय गरिएको छ ।
छुटेका अनुहारमा लेखक सायनले आफूले भेटेर छुटेका अनुहार र तिनको मनोृत्तिको सूक्ष्म चित्रण गरेका छन् ।
त्यसैगरी प्रतिष्ठानले पद्मश्री साधना सम्मान इतिहासविद् तथा संस्कृतज्ञ डा. पन्तलाई दिने निर्णय गरेको छ ।
डा. पन्तले नेपाली इतिहास र संस्कृतिलाई लिपिवद्ध तथा जर्गेना गर्दै आएका छन् भने उनले दुईसय भन्दा बढी शोध लेखका साथै ६ वटा पुस्तक प्रकाशित समेत गरेका छन् । २००९ सालमा पिता नयनराज पन्तले सुरु गरेको संशोधन मण्डलका अभियन्ता डा. पन्तले २०२१ सालदेखि इतिहास प्रधान पूर्णिमा प्रकाशन समेत गर्दै आएका छन् । उक्त सम्मानको राशी रु. दुई लाख रुपैँया रहेको छ ।
वि.स. २०६३ सालदेखि खेमलाल हरिकला लामिछाने प्रतिष्ठानले नेपाली साहित्यका वर्षभरि प्रकाशित पुस्तकमध्ये निर्णायक मण्डलले उत्कृष्ट ठहर्याएकाको पुस्तकलाई प्रत्येक वर्ष पद्मश्री साहित्य पुरस्कार अर्पण गर्दै आएको छ ।
त्यस्तै वि.सं.२०६७ सालदेखि प्रतिष्ठानले साहित्य, कला, सङ्गीत, अभिनय आदि क्षेत्रमा दीर्घ साधना गरेका वरिष्ठ साधकलाई पद्मश्री साधना सम्मान प्रदान गर्दै आएको पनि प्रतिष्ठानका अध्यक्ष जीवा लामिछानेले जनाएका छन् । साथै उक्त दुवै सम्मान तथा पुरस्कार कोजाग्रत पूर्णिमाको दिन प्रदान गरिने बताइएको छ ।
वि.सं.२०७६ भदौ १० मंगलवार १६:३४ मा प्रकाशित
