हामी सबैकाे संसारन्यूज

अचेल मान्छे, मान्छे कम
ज्यादा यान्त्रिक बन्दै गएको छ ।
त्यसैले त झ्याप्पै तात्तिन थालेको छ ।
जसरी तात्तिन्छ त्यसैगरी मान्छे
मात्तिन र आत्तिन पनि थालेको छ ।

अचेल मान्छे, मान्छे कम
ज्यादा पशु हुँदै गएको छ
त्यसैले त बुद्धि विवेक गुमाउदै गएको छ ।
जसरी बुद्धि विवेकहीन बनेको छ
त्यसैगरी मान्छेले
आफूलाई गाड्ने गहिरो खाडल
स्वयं आफैले खनेको छ ।

अचेल मान्छे, मान्छे कम
ज्यादा ब्याधा हुँदै गएको छ ।
त्यसैले त सिङ्गो मान्छे
आधा हुँदै गएको छ ।
जसरी ब्याधा भएसङ्गै
आधा भएको मान्छे
दिनप्रतिदिन खुनी हुँदै गएको छ ।
त्यसैगरी झन् बढी बैगुनी हुँदै गएको छ ।

अचेल मान्छे कोइली कम
ज्यादा काग बनेर कुर्लिन थालेको छ ।
अचेल मान्छे नदी कम
ज्यादा खहरे बनेर उर्लिन थालेको छ ।

यसरी मान्छे हुनुको अर्थ
अनर्थमा झरेसङ्गै
मान्छेबाटै मान्छेको अस्तित्व महासंकटमा परेको छ ।