हामी सबैकाे संसारन्यूज

११ पुष, चितवन । नेपाल कम्युनिष्ट पार्टीका अध्यक्ष एवं पूर्वप्रधानमन्त्री पुष्पकमल दाहाल ‘प्रचण्ड’ले रंगशाला निर्माणमा कलाकार सिताराम कट्टेल (धुर्मुस) र कुन्जना घिमीरे (सुन्तली) लाई सहयोग गर्ने बताएका छन् ।

चितवनको रामपुरमा निर्माणाधीन गौतमबुद्ध अन्तरराष्ट्रिय क्रिकेट रङ्गशालाको शुक्रबार अवलोकन गर्ने क्रममा अध्यक्ष प्रचण्डले पार्टी र सरकारले रङ्गशाला निर्माणमा सहयोग गर्ने बताएका हुन् ।

अध्यक्ष प्रचण्डले भने, -रङ्गशालाको कामले गति लिएकामा उत्साहित भएको छु, समयमै सम्पन्न गर्नेगरी गुणस्तरीय काम गर्नुहोस्, हामी तापाईंकै साथमा छौँ ।” उनले रङ्गशाला राष्ट्रिय गौरवको आयोजना भएको भन्दै सफल बनाउन सबै देशवासी लाग्नुपर्ने समेत बताए ।
रङ्गशालाको निर्माणको गतिले तीव्रता पाएकामा आफू खुशी भएको बताउँदै अध्यक्ष प्रचण्डले सबै जिल्लामा सहयोग समिति गठन गरेर रङ्गशाला निर्माणमा सहयोग जुटाउन समेत गर्दै चितवनवासीलाई मन फुकाएर सहयोग गर्न समेत आव्हान गरेका थिए ।

उक्त अवसरमा धुर्मुस सुन्तली फाउण्डेशनका अध्यक्ष सीताराम कट्टेलले रङ्गशाला निर्माणमा भएको प्रगति र गुरुयोजनाबारे अध्यक्ष प्रचण्डलाई जानकारी गराएका थिए । सो अवसरमा प्रदेशसभा सदस्य विजय सुवेदी, भरतपुर महानगरपालिका प्रमुख रेनु दाहाललगायत पनि उपस्थित रहेको थियो ।