हामी सबैकाे संसारन्यूज

११ फागुन, काठमाण्डौं । पूर्वप्रधानमन्त्री तथा नेपाल कम्युनिष्ट पार्टी (नेकपा) का अध्यक्ष पुष्पकमल दाहाल ‘प्रचण्ड’ ले एमसीसीका विषयमा आफू गम्भीर रहेको बताएका छन् ।

नागरिक आवाज नेपालमा संलग्न विभिन्न संघ संस्था र आवद्ध व्यक्तिहरुको एमसीसी खारेजी मागपत्र बुझ्दै अध्यक्ष प्रचण्डले नेकपाको केन्द्रीय समितिद्धारा निर्मित आयोगले बुझाएको रिर्पोट र नागरिक आवाजका नाउँबाट आएको अनुरोधको भावना उस्तै भएको जनाउँदै राष्ट्रियतालाई अहित गर्ने काममा आफू र पार्टी सरिक नहुने प्रतिबद्धता गम्भीरताका साथ व्यक्त गरेका छन् ।

नेकपा पार्टी मुख्यालय धुमबाराहीमा आइतबार मागपत्र बुझाइएको उक्त कार्यक्रममा नेकपाका नेताहरु नारायण शर्मा, किशन शर्मा, लोककृष्ण भट्टराई, कमान सिंह लामासहित साध्य बहादुर भण्डारी, नीलकण्ठ तिवारी, गणेश सिंखडा, आरसी न्यौपाने, भरत शर्मा, लोक प्रसाद भुर्तेल, भरत गौतम, राजेन्द्र देशभक्त, डा। शम्भु कट्टेल, भावना विद्रोही तथा गुठी विधेयकविरुद्ध नागरिक आन्दोलन चलाएका असोज कुमार मर्हजन र रविन्द्र श्रेष्ठ लगायतका अभियन्ताहरुको सहभागिता रहेको थियो ।

कार्यक्रममा नेकपाका अध्यक्ष प्रचण्डसँगै कार्यदलका सदस्य भीम रावल र केन्द्रीय सदस्य नारायण दाहाल समेतको उपस्थिति थियो भने लोककृष्ण भट्टराई, नारायण शर्मा, कमान सिंह लामा, साध्य बहादुर भण्डारी र भावना विद्रोहीले आफ्ना भनाई राखेका थिए । नागरिक आवाज नेपालद्धारा दिइएको एमसीसी खारेज सम्बन्धी मागपत्र संयोजक असोज कुमार मर्हजनले पढेर सुनाएका थिए ।