हामी सबैकाे संसारन्यूज

२३ फागुन, काठमाण्डौं । विश्व स्वास्थ्य संगठनले कोरोना भाइरस नियन्त्रणको पूर्वतयारी अन्तर्गत १५ सय फिजिकल प्रोटेक्टिभ प्रोटेक्टिभ इक्विपमेन्ट (पिपिई) को व्यवस्था गर्न सरकारलाई लिस्टसहित निर्देशन दिएको छ ।

संगठनले शरीर ढाक्ने सुरक्षित लुगा, विशेष चश्मा, भाइरस फिल्टर गर्ने माक्स, पन्जा लगायतको सूचीनै बनाएरै सरकारलाई बुझाएको शुक्रबारको नयाँपत्रिका दैनिकमा समाचार छ । तर, स्वस्थ्य मन्त्रालय व्यवस्थापन महाशाखाले बजेट नभएको भन्दै खरिद गर्न सकेको छैन । एक व्यक्तिबाट अर्को व्यक्तिमा संक्रमण फैलन नदिन विशेष सुरक्षा साधन प्रयोग गर्नुपर्छ । ‘डब्लूएचओले भने अनुसार तत्काल पिपिई जुटाउन सक्ने अवस्था छैन,’ महाशाखा प्रमुख भोगेन्द्र डोटेलले भने, ‘सातसय पिस किन्न मात्रै पनि २८ करोड लाग्ने बजेट देखियो । यति रकम स्वास्थ्य मन्त्रालयसँग छैन ।’

त्यसैगरी महाशाखाले मास्क खरिदका लागि आव्हान गरेको टेन्डरसमेत रद्द भएको छ । एन मास्क ९५ खरिदका लागि महाशाखाले खुलाएको टेन्डरमा १० कम्पनीले प्रस्ताव हालेका थिए । बिगतमै किनेको दरमा तीन सय रुपैयाँ राखेर टेन्डर खोलिएको थियो । तर, कम्पनीहरुले प्रतिगोटा चार सय ५० रुपैयाँको दररेट प्रस्ताव गरेपछि टेन्डर रद्द भएको डोटेलले बताएका छन् । कम्पनीहरुले रेट बढाएपछि अब स्वास्थ्य मन्त्रालयसँगै छलफल गरेर दर बढाएर मास्कलगायतका अन्य अत्यावश्यक उपकरणको पुनः टेन्डर खुलाउने तयारी रहेको पनि डोटेलले बताए ।